Alcala nahingawa sa mga mag-uuma sa Bohol
CEBU, Philippines - Aron masulbad dayon ang dakong epekto sa bagyong Yolanda ug sa linog nga mitay-og sa probinsya sa Bohol, dili pa dugay, ang Department of Agriculture Regional Office – 7 (DA-7) uban sa mga representante sa Local Government Units (LGUs) sa probinsya sa Bohol lakip na ang representante sa ubang ahensya sa gobyerno nagtagbo didto sa dakbayan sa Tagbilaran, Bohol aron sa paghisgot sa posibleng mga proyekto nga angay ipatuman alang sa maong probinsya.
Ang usa sa mga bisita sa maong panagtigom mao si DA Secretary Proceso Alcala nga miadto og tuyo sa maong lalawigan alang sa maong katuyoan. Si Alcala nakalitan sa iyang nadungog nga gikan mismo ni DA-7 Regional Director Angel Enriquez labot sa dakong kadaot nga nahiaguman sa maong probinsya gumikan sa miaging duha ka kalamidad.
Sumala pa ni Secretary Alcala nga ang mga proyekto nga makapugong sa maot nga epekto sa miaging kalamidad mao ang mga probisyon sa pagpananom og mga materyales alang sa seaweeds ug Sisal, rehabilitasyon sa mga pasilidad sa agrikultura ug irigasyon, probisyon sa liso sa humay, mais, mga utanon ug uban pang mga tanom.
Gipasalig usab ni Alcala nga ipadayon pa nila ang paghatod og mga programa sama sa artificial insemination, suporta sa pagpahigayon og veterinary missions pinaagi sa probisyon sa mga bakuna ug usab market matching alang sa mga mag-uuma ug mamalitay sa mga agrikultural nga produkto.
Gitug-an ni Alcala nga ang ilang opisina nakig-alayon sa Land Bank of the Philippines alang sa loan package alang sa kalamidad ngadto sa apektadong mga mag-uuma ug mangingisda nga adunay repayment period nga 15 ka tuig.
Giawhag ni Alcala nga mosumiter og proposals sama sa Bohol Provincial Veterinarian ug ang ubang staff sa agrikultura alang sa posibleng proyekto nga makahatag og tabang sa sector sa agrikultura sa probinsya sa Bohol. (BANAT NEWS)
- Latest