P100 mil nabawi sa kapolisan gikan sa snatcher

CEBU, Philippines - Nabawi sa kapolisan ang P100 mil nga salapi nga gilabni  sa usa ka menor gikan sa babaye nga negosyante  og P.O. card  didto  sa Osmeña Boulevard sa dakbayan sa Sugbo kagahapon  pasado  alas 10:00  sa buntag.

Ang biktima naila nga si Felicitas Veloria Roble, 57, molupyo sa Highway Tagunol, barangay Basak-Pardo, sa dakbayan sa Subgo.

Matud pa ni SPO3 Romeo Abellana, Chief investigator sa Waterfront Police Station nga nahinabi sa Banat News  nga ang biktima nagbarog sa daplin  sa karsada  sa Osmeña Boulevard sa Barangay Sto. Niño nga may dalang salapi nga gisulod sa gamay nga plastic bag.

Matud pa ni Abellana nga padulong unta nga isulod ni Roble ang maong plastic bag sa iyang shoulder bag dihang gilabni kini sa 16-anyos nga suspetsado. Nagisi ang plastic ug natagak ang duha ka bundle nga salapi ug nag-inilogay ang duruha.

Nakuha sa suspetsado ang kwarta ni Roble apan dihang ilogon unta sa biktima ang iyang kwarta gitionan siya og kutsilyo ug  gihan-an  siya og  luba  niini.

Daling midagan ang suspetsado apan nadakpan kini sa kapolisan  ug  nabawi  ang P100 mil  nga  salapi. Ang suspetsado nga nahinabi sa Banat News miingon nga nabuhat lang niya kadto kay gihulga siya nga patyon sa upat ka lalaki.

Matud pa sa suspek nga  sa iyang panginabuhi nga pagtinda og prutas  matag adlaw sayo siya nga mangompra sa Carbon Market.

Apan kagahapong adlawa gitulis siya sa upat ka wala hiihing lalaki ug gikuha ang iyang puhonan sa pagbaligya og prutas.

Matud pa sa suspetsado nga gihulga siya sa upat ka tawo nga patyon ug gipakuyog siya niini sa usa ka mall sa dalan Colon ug gisugo nga labnihon ang kwarta ni Roble.

Tungod sa kahadlok matud pa sa suspetsado iyang gituman ang gisugo kaniya sa upat ka lalaki hinungdan sa iyang pagkasikop.

Kasamtangang natanggong ang suspetsado sa karsel sa Waterfront Police Station ug  matud pa ni Abellana nga mag-agad sila sa DSWD kun buhian ba ang maong suspetsado.  (BANAT NEWS)