Suspek sa nagsunod nga pagpatay ug tulis sa Cebu City nadakpan

CEBU, Philippines - Mag-atubang og patong-patong nga kaso ang usa ka lalaki nga nasikop sa kapolisan sa dakbayan sa Lapu-Lapu sa miaging kaadlawon human kini giila sa kapolisan  nga may kalambigitan tulis ug patay sa dakbayan sa Sugbo.

Ang maong lalaki naila nga si Sandy Kho, 32, molupyo sa barangay Gun-ob sa dakbayan sa Lapu-Lapu.

Si Sr. Supt. Rey Lyndon Lawas ang hepe sa Lapu-Lapu City Police Office nga nahinabi sa mga tigbalita miingon nga nadakpan si Kho sa usa ka checkpoint ug mipabuto kini sa mga polis.

Nakuha gikan kang Kho ang usa ka kalibre .45 nga pistola ug usa ka KG-9 submachine pistol nga hugtanong gihimakak sa suspek nga iyaha.

Nasuta sa kapolisan nga ang maong suspetsado may kalambigitan kini sa kamatayon sa ahente sa memorial plan nga si Edgar Cañete sa barangay Banilad sa dakbayan sa Sugbo niadtong Disyembre 2 ning tuiga.

Nalambigit usab ang suspetsado sa duha ka mga sunod-sunod nga pagpanulis nga naglakip sa tulis sa barangay Inayawan diin dul-an sa duha ka milyon ang ilang nadala ug sa pagtulis sa usa ka botika sa Nasipit, Talamban pulos sa Cebu City. Sumala pa sa City Police Director Sr. Supt. Noli Romana, miangkon sa tulo ka mga krimen ang suspek.

“He admitted to at least three crime incidents where he and his group were involved, first of course young sa barangay Inayawan ‘yong robbery hold-up and later in the same day in the afternoon ‘yong sa Rose Pharmacy,” sumala pa ni Romana.

Si Romana midugang nga giangkon ni Kho nga may kalambigitan siya sa  pagpusil patay kang Cañete.

“During the conduct of the investigation nag-admit din siya doon sa December 2 incident wherein a certain Mr. Edgar Cañete who just came out from the RCBC (bank) branch in Banilad was shot to death,” dugang ni Romana.

Matud pa ni Romana nga ang mipusil sa maong tawo gibayran og P25 mil.

Apan si Kho nga nahinabi sa mga tigbalita miingon nga dili siya mismo ang nagtulis ug nagpusil sa maong mga krimen, matud niya gihimo lang siyang drayber sa iyang mga kauban niadtong mga higayona.

Mi-offer pa hinuon si Kho nga andam siya nga motabang sa kapolisan  aron masikop ang lain pa niyang tulo ka mga kauban nga taga Cebu City, Lapu-Lapu ug taga Camotes.

Gidala kagahapon si Kho sa dakbayan sa Lapu-Lapu ug gipaubos kini sa inquest proceeding tungod sa tulo ka mga kasong gipasaka batok kaniya kalabot sa pagkaaresto kaniya. (BANAT NEWS)