Ahente gipusil patay

CEBU, Philippines - Usa ka ahente sa life plans ang gipusil patay dihang padulong na kini

mosakay og taxi sa wala pa mailhing tawo  diha sa dalan A. S. Fortuna sa barangay Banilad sa dakbayan sa Sugbo pasado alas 10 kagahapon sa buntag.

Ang biktima naila nga si Edgar Cañete, 45, molupyo sa barangay Jugan sa lungsod sa Consolacion. Samtang napagan usab ang uyoan niini nga si Rudy Gapito, 63, molupyo sa barangay Poblacion Looc sa lungsod sa Liloan.

Base sa imbestigasyon sa Homicide Section sa Cebu City Police Office nga ang biktima nakadawat na og hulga pinaagi sa text messages.

Sumala pa ni SPO4 Alex Dacua nga ang maong text message miingon nga "magbantay mo ini’g kuha ninyo sa kwarta sa bangko."

Dugang pa ni Dacua nga posibleng hired killer ang gunman tungod kay wala man kini magtaptap sa iyang nawong dihang gipusil niini ang biktima.

Matud pa ni Dacua nga nahitabo ang pagpamusil pipila ka minutos human mogawas si Cañete ug ang iyang live-in partner nga si Sheila Bagiuo ug si Capito nagkobra og kapin sa tunga sa milyon nga kwarta sa usa ka bangko sa A.S. Fortuna. Wala hinuon kuhaa ang kwarta sa biktima.

Giingong naghulat na ang suspetsado sa gawas sa maong bangko ug dihang migawas na ang biktima gipangutana kini sa suspetsado kun siya ba si Edgar.

Human mitando ang biktima nagka-estorya pa sila sa suspetsado ug matud pa ni Dacua nga nakadungog ang ubang saksi nga miingon ang biktima nga ang iya na lang abogado ang mo-settle sa problema.

Dihadiha gikatahong mibunot og armas ang lalaki ug gipusil  ang biktima apan natapi  kini sa biktima hinungdan nga naigo sa tiil si Capito apan giusban pagpusil sa lalaki ang biktima sa kalawasan.

Daling misibat ang gunman sakay sa usa ka motorsiklo nga gimaneho sa lain pang lalaki.

Gidala sa Gullas Medical Hospital ang biktima apan patay na kini nga nahidangat sa maong tambalanan.

Narekober sa kapolisan ang pito ka kabhang sa kalibre .45 sa crime scene apan wala na niini masikop ang mga mamumuno.  (BANAT NEWS)