UN padayong nangita og dugang pundo alang sa mga biktima sa bagyong Yolanda
CEBU, Philippines - Nangita pa og dugang pundo ang United Nations gikan sa international community aron tabangan ang Pilipinas ug ang apektado niining mga molupyo nga makabaton og pinuy-anan ug temporaryong trabaho tungod sa pagkaguba sa ilang mga kinabuhi human sa bagyong Yolanda.
"Providing shelter and rebuilding lives is an urgent priority," sumala pa ni UN resident ug humanitarian coordinator Luiza Carvalho sa report sa GMA News.Tv.
Matud pa niya daghan pa kaayong panginahanglan aron makabarog pagbalik ug mabalik sa normal ang kinabuhi sa mga biktima.
Samtang ang tigpamaba sa UN nga si Orla Fagan nagkanayon nga nakatigom na sila karon og $164 milyones nga katunga pa lang sa gipangayo sa UN nga $301 milyones sa usa ka ‘flash appeal’ nga gilusad sa UN niadtong Nobiyembre 12, upat ka adlaw human sa pagkusokuso sa bagyong Yolanda.
Ang UN relief agencies gikatakdang mopokus na sa nagkalain-laing mga plano alang sa usa ka tuig nga rehabilitation effort sa mga naapektahang mga lugar inabagan usab sa mga proyekto ug plano sa gobiyerno. (BANAT NEWS)
- Latest
