Kulbahinam apan kataw-anan ang mga hitabo sa Medellin

CEBU, Philippines - Nahimong kataw-anan ug kulbahinam ang resulta sa pagtubag sa mga opisyal ug mga awtoridad sa lungsod sa Medellin sa mga alarma labot sa kadudahang mga tawo sa lugar human sa bagyo.

Gumikan sa kahadlok sa ubang mga tawo sa mga nikatap nga mga taho, daghan kanila ang namakwit ngadto sa munisipyo sa lungsod.

Matud pa ni Mayor Ricky Ramirez nga may usa ka lugar nga ilang giadto human gikataho nga dunay nanghasi sa usa ka balay nga gisaka og mga tawo.

Awaaw sumala pa ni Ramirez ang maong lugar hinungdan nga gibati usab sila og kakulba samtang hinay ang ilang lihok paduol sa usa ka gamay nga balay layo sa karsada. Matud  pa  ni  Ramirez  nga  gisenyasan   niya  ang  iyang  mga  kauban   nga  dasmagan  og  kalit ang  pultahan  niini .

Samtang  nagpaingon  sa pultahan,  ang  usa  kanila nagkupot sa flashlight samtang   ang usa   maoy nagtion sa armas ug giablihan dayun og kalit ang tolda ug giiwag ang suga. “Nahibung ko’g dako nga niatras man nuon ang duha ug gipawong ang ispat ug nangutana dayun ko’g unsay nahitabo ug nihunghung akong sakop nga naghilawas,” matud pang Ramirez.

Laing taho mao ang girespondehan sa usa ka barangay kapitan ug mga tanod nga giingong usa ka tawo nga nagtakin og armas.

Matud pa ni Ramirez nga nagtuo gyud ang usa ka tanod nga .45 kalibre nga pistola   ang gitakin sa tawo nga ilang gilibotan.

Tulo ang nidasmag dayun gilayog aron dili makalihok, apan usa ka botelya nga bino ang ilang nakuha sa hawakan sa tawo.

 Samtang si Konsehal Raymond Olivar nga nakaresponde usab og alarma mipahibawo nga walay kamatuoran ang mga kahadlok sa mga tawo labi na sa giingong mga pugante gikan sa Tacloban.

Maoy  hinungdan  nga  gipahunong  ni  Olivar  ang  mga  estorya  nga  walay  kamatuoran  kay  naluoy  usab  siya  sa  uban  nga  dali  kaayong  motuo   ug  mahadlok. Kagahapon, sila  si  Ramirez niresponde usab sa alarma nga adunay pumpboat nga nagpundo duol sa isla sa Gibitngil.

Ilang nasuta nga nagkarga kini og softdrinks padulong sa isla sa Doong sa Bantayan ug nagpasalipod lang gumikan sa medyo kusog nga hangin.

Usa ka Nanith Pones mipahibawo nga gitawgan siya sa iyang mga paryenti sa Gibitngil labot sa mga pugante gikan sa Tacloban nga naabot sa isla.

“Thanks Mayor Ricky Ramirez for the rescue and for checking on time. Truly we can always count on you,” matud pang Pones sa iyang Facebook. (BANAT NEWS)