BFP-7 mibahad nga mokiha kang Mayor Rama

CEBU, Philippines - Mibahad mopasaka og kaso ang Bureau of Fire Protection sa gihulagway nila nga pagpangbastos kanila ni Mayor Michael Rama sa pagtratar kanila nga sama sa mga basura.

Kini may labot gihapon sa isyu sa pagpapahawa kanila sa Cebu City government diha sa ilang buhatan sa BFP-7.

Si Sr. Supt. Ma. Luisa Hadjula , direktor sa BFP7 sa interbyu kaniya sa DyRC Radyo Calungsod “Dial Your Opinion” program ni Prof. Nestor Ramirez  miingon nga modangop sila sa Ombudsman ug sa Integrated Bar of the Philippines tungod sa giingong pamaagi sa mayor basta lang miabog kanila sa ilang kaugalingong building.

Matud pang Hadjula nga niadtong Oktubre 18 nakurat na lang sila nga basta lang sila gipadad-an og mga dumptrucks ug gimandoan silang papahawaon.

Sumala pa nga giingnan sila nga gipailawom na ang siyudad sa state of calamity ug ang mayor maoy dunay gahom ug gimando niini nga pabalhinon na sila dayon ngadto sa Abellana Sports Complex.

Samtang gibutyag usab ni Hadjula nga samtang wala pa siya makabalik dinhi sa Sugbu, misumbong kaniya ang iyang mga sakop sa pagsulod sa mayor sa iyang opisina ug milingkod sa iya mismong desk ug gipatawag ang kabomberohan.

Mipasangil usab si Hadjula nga gibali-bali og kasaba sa mayor ang mga bombero butang nga wala niya ikahimuot.

Si Hadjula nagkanayon nga  bisan na-confine siya sa tambalanan didto sa Manila pagkahibalo niya sa gibuhat sa mayor napugos siya sa pagpirma og waiver sa mga doctor aron lang siya makabalik dinhi sa Sugbu.

Apan sa iyang pag-abot, wa gyud siya atubanga sa mayor kay milakaw na kini ug gibilin si kanhi konsehal Edu Rama mao nga silang duha na lang maoy nagkasabot sa ‘win-win’ solution.

Kini mao ang pagtugot niya nga gamiton ang halos 75 porsiyento na sa ilang building aron lang dunay kasudlan sa mga pasyente.

Apan gikasagmuyo niya nga migawas na hinuon karon sa mga balita nga silang mga bombero ang nahimong dautan kabahin sa maong isyu. (BANAT NEWS)