Ihawan sa syudad gipasirhan kay peligro

CEBU, Philippines - Nakasinati og dakung kahasol ang mga negosyante og kahayopan kagahapon dihang gipakalitan pagsirado ang ihawan sa dakbayan sa Sugbo nga  nahimutang sa North Reclamation Area.

Si City Veterinarian Pilar Romero mitug-an nga gimandoan siya ni Mayor Michael Rama nga pasirad-an ang ihawan tungod kay ang mga engineer sa dakbayan miisip na niini nga peligroso na gamiton.

Matud ni Romero nga bisan Domingo  kagahapong adlawa apan gipadad-an gayud sa City Hall og mga engineer ang ihawan tungod sa daghang mga liki human sa linog kaniadtong Martes ug nabantayan nga nag-anam kadagku.

Gani matud ni Romero nga ang sementado nga tangke sa tubig sa ihawan miharag na ug naghatag og timailhan nga adunay nagsingabot nga peligro kun mopadayon sila paggamit sa ihawan. Si Toto Maloloy-on nga usa sa mga negosyante og kahayopan nagbagulbol kay matud niya wala sila pahibaw-a daan aron unta makapangandam.

Matud ni Dr. Romero nga ang maong mga negosyante og kahayopan mahimong adto lang usa magpaihaw sa mga pribadong ihawan, apan kinahanglang ipasusi usa sa mga meat inspectors ang ilang mga hayop sa dili pa ihawon.

Gitataw usab ni Romero nga kadtong mga baboy o manok nga adto ipaihaw sa mga ihawan gawas na sa dakbayan sa Sugbo nga dili accredited sa National Meat Inspection Service (NMIS) dili mahimong dad-on ang mga karne dinhi aron ibaligya.

Ang lagda sa NMIS nga kadtong mga karne nga naihaw sa mga ihawan nga Category AA mao ra’y mahimong dad-on ug ibaligya sa lain nga mga dapit.

Kadtong ihawan nga Category AAA, ang mga karne nga  maihaw niini, mahimong itumod sa laing mga nasud. (/WC) (BANAT NEWS)