Naigo sa sinkhole di na pabalikon

CEBU, Philippines - Dili na pabalikon sa ilang pinuy-anan ang mga panimalay nga naapektuhan sa landslides ug sinkhole sa dakbayan sa Lapulapu.

Matud pa ni Lapulapu City Administrator ug CDRRMC Deputy Action Officer Teodolo Ybañez dili na nila pabalikon sa ilang mga pinuy-anan ang walo ka pamilyang naapektuhan sa pagkahugno sa sinkhole sa Sitio Kapayas, Brgy. Canjulao dakbayan sa Lapulapu atol sa linog dinhi sa Sugbu.

Ang 21 ka units sa duha ka andanang apartment nga gipanag-iya ni James Berdin diin walo ka pamilya ang panimalay.

Sa uwahing report, giingong miunlod og lima ka tiil ang mga balay diha sa baba sa sinkhole nga may gilapdong kinse ka metros. Hinuon walay natala nga nasakitan sa maong hitabo.

Samtang naliki ang ulo sa estatwa ni Datu Lapulapu nga nahimutang sa Mactan Shrine sa Brgy. Mactan dakbayan sa Lapulapu.

Matud pa ni Ybañez ug Andy Berame sa CDRRMC lakip sa nadaut mao ang Liberty Shrine.

Hinuon mipadayag si Ybañez nga dali ra maayo ang liki sa ulo ni Lapulapu ug ang mga bloke nga natangtang sa tumoy sa Liberty shrine.

Samtang doble ang himoon inspection sa mga sakop sa CDRRMC sa tanang edipisyo sa dakbayan sa Lapulapu lakip ang mga edipisyo sa pribadong negosyante subay sa kamandoan ni Mayor Paz Radaza.

Sa taho sa CDRRMC pipila ka dagkong hotel sa dakbayan sa Lapulapu ang nakasinati og ginagmay nga kakulian mugna sa linog. (BANAT NEWS)