Basurang plastic sa Talisay mikunhod

CEBU, Philippines - Mikunhod  ang mga basura nga plastik  sa Tabunok, dakbayan  sa Talisay  sukad  ipatuman  ang  pagdili  sa  mga plastic  nga iputos sa mga baligya.

Si Edwin Nierves, hepe sa Solid Waste and Management sa Talisay mibutyag  nga miuban kanila si Mayor Johnny De los Reyes atol sa gipahigayong information drive sa pag-ban sa mga plastik.

Matud ni Nierves nga ang Tabunok nga maoy commercial area sa siyudad maoy nasentro sa ilang information drive.

Tanang mga mangompra ilang  giawhag nga sa sunod nilang pagpangompra  padad-on  na sila og mga buyot o recyclable bag nga sudlan sa ilang mga kinompra.

Kini  tungod  kay sa  panahon sa ting-uwan ang mga kanal sa siyudad moawas  tungod sa mga basura nga makabara sa mga kanal.

Nasud-ong  usab  nga kasagaran sa mga basura  nga plastic  magdasok  sa  mga  kanal  nga  makapabara  usab  sa tubig.

Si Nierves mibana-bana nga mga 40 porsiyento sa basura sa Tabunok nga ilang mahakot mga plastik apan mikunhod kini  og  30 porsiyento human sa gipahigayong information drive.

Ang  ubang mga establisamento  sa Tabunok mga bulsita na   nga  papel ang gigamit nga putos sa ilang tinda.

Apan  aduna pay mga establisamento   nga  mihangyo sa kagamhanan sa siyudad nga hutdon una nila og gamit ang ilang mga napundong plastik nga putos una pa sila mogamit og mga bulsita.

Si Nierves nanghinaot nga ang katawhan mosubay sa nahisgutang balaod tungod kay alang  ra kini sa kaayohan sa tanan.

Sa laing bahin, si Nierves nagkanayon nga sa pagsaulog sa  pista sa  Talisay gilauman nilang magdasok   ang mga basura tungod kay daghan man ang mga bisita nga modagsa sa siyudad  ug daghan usab ang mga  maninda.

Apan matud ni Nierves nga gipangandaman na nila ang maong sitwasyon  diin ilang paningkamutan nga human sa pista  malimpiyo dayon ang palibot sa Talisay. (/WC) (BANAT NEWS)