Tulisan gitusak sa bala
CEBU, Philippines - Natusak sa mga bala ang lawas patay sa usa ka giingong tulisan human kini rakraki sa wala hiilhing mamumuno didto sa sitio Hawod, barangay Bulacao, dakbayan sa Talisay niadtong Martes sa gabii.
Si Senior Inspector Al Pascual, deputy sa Talisay City Police Station miila sa gipatay nga si Carl Eric Campo alyas “Negroâ€, hingkod, taga barangay Pook, dakbayan sa Talisay.
Matud ni Pascual nga si Campo nakaangkon og walo ka mga samad pinusilan sa iyang ulo ug lawas ug patay na kining nahidangat didto sa Talisay City District Hospital. Sayo niini ang kapolisan nakadawat og report bahin sa usa ka lalaking gipusil hinungdan nga si Pascual uban nila ni SPO1 Mikie Espina, PO1 Stephen Sefuesca ug PO1 Edwin Campomanes daling miresponde sa maong report.
Naabtan sa mga polis si Campo nga nagbuy-od sa lugar nga nahitaboan naligo sa kaugalingong dugo ug ang patay’ng lawas niini gibutangan og tag nga karton nga adunay markang “Tulisan koâ€.
Sa imbestigasyon sa mga polis, nasuta nga sa wala pa pusila si Campo, giingong nagsakay kini sa iyang kolor puwa nga XRM Honda nga motorsiklo nga nagtangag sa plakang 7TC-Q-1931.
Apan giingong kalit lang mitungha ang usa ka wala hiilhing lalaki ug sa wala’y pupangutana, giligid og pusil si Campo.
Napunitan sa kapolisan gikan sa lugar nga nahitaboan ang usa ka kabhang sa bala sa kalibre .45 nga pistola ug usa ka lumping nga bala , ug usa ka buhing bala sa mao gihapong kalibre sa armas.
Subay niini si Superintendent Resty Santos, officer-in-charge sa Talisay City Police Station mibutyag sa Banat News nga nakadawat sila og report nga si Campo giingong nalambigit sa mga insidente sa tulis sa dakbayan sa Talisay.
Matud ni Santos nga usa sa ilang gitutokan nga anggulo sa pagpatay ni Campo, mao nga posibleng gipanimaslan kini sa iyang nabiktima o ba kaha nagkabangi kini sa iyang kauban ug giunay sa pagpatay.
Gisalikway ni Santos ang giingong vigilante ang mipatay kang Campo.
“Wala may vigilante sa Talisay…dili ta moingon og vigilante,†ni Santos pa.
Dugang pa niya nga bisan og suspetsado sa insidente sa mga tulis si Campo angayan gihapon unta kining ipaubos sa “due process of law†o ipasubay sa balaud kung aduna man ugaling kini nahimong kalapasan. (BANAT NEWS)
- Latest