Gihigpitan ang pagdawat og enumerator

CEBU, Philippines - Higpit  ang  pamaagi  sa Department of Social Welfare and Development (DSWD)7 sa pagdawat  og  mga  trabahante isip enumerators.

Matud pa  ni  Assistant Regional Director  Nemia  Antipala sa DSWD 7  nga nagkinahanglan sila  karon  og 700  kapin  ka  enumerator.

Miingon  si  Antipala  sa Banat News  nga  bisan  unsa  ka professional sa  aplikante  kun  wala  kini  mograduwar og kurso  bahin sa community service, dili gyud  nila  dawaton.

Midugang  siya  nga  tungod  kay P20 mil ang  binuwan  nga  suweldo, daghan  kaayong  mi-apply  sa  maong  trabaho.

Matud  ni  Antipala  nga  may  mga  engineer, nurse, BSEED, ug  uban  pang  degree, tungod  sa kadako  sa suweldo  nga  ihatag  kanila, apan wala  sila’y  gidawat  niini.

Maoy  hinungdan  nga  ang  upat   ka  mga  dagkong  eskuylahan  sa Cebu  ug  Dumaguete  mitanyag  nga  mobukas  sa duha  ka buwan  nga  kurso bahin  sa community service  aron  lang sa pagbansay  sa  mga  gustong mo-apply  sa  DSWD.

Miingon  si  Antipala  nga  may labot  kini  sa programa  nga  paghatag  og  mga  proyekto  sa kabarangayan  sa rehiyon  nga  ilusad  unya  sa Enero 2014.

Busa  tungod  kay   ang  trabaho  sa  mga  enumerator  nga  ilang  kuhaon  mao  ang  pagpakig-atubang  sa  mga  opisyal  sa lungsod  ug  kabarangayan, gikinahanglan  nila  ang  community service graduate  aron  nga  mosakar  ang  ilang  abilidad  sa pakig-atubang  sa  mga  opisyal  ug  katawhan  sa komunidad.  (BANAT NEWS)