Milabog og granada ug namusil sa police checkpoint gikiha

CEBU, Philippines - Napasakaan na og kasong ilegal nga paghupot og eksplosibo ug armas kagahapon sa buntag diha sa piskaliya sa dakbayan sa Talisay ang duha ka suspetsadong mga tulisan.

Kahinumduman nga sila si Jake Solis Macarambon ug Elmer Aballe Macarambon gipasanginlang mipusil ug milabay og granada sa mga polis nga nag-checkpoint diha sa Ramona Village, barangay San Isidro niadtong Lunes sa gabii. Apan ang pusil ug granada pulos mikagar hinungdan nga nasikop ang duha sa mga polis.

Si Superintendent Resty Santos, officer-in-charge sa Talisay City Police Station mibutyag sa Banat news kagahapon nga napasaka na nila ang nahisgutang mga kaso batok sa mga suspetsado.

Matud ni Santos nga natahap silang ang mga suspetsado duna kini grupo nganhi sa Sugbo.

Giingong ang mga suspetsado nangangkong parehong nagpuyo diha sa Ramona Village, barangay Dumlog apan matud sa asawa ni Elmer nga mianha sa police station nga naa sila magpuyo sa barangay Ermita, dakbayan sa Sugbo.

Nasuta usab sa mga polis nga ang duha lumad nga taga probinsiya sa Mindanao.  Matud usab ni Santos nga ang asawa ni Elmer nanghangyo  ngadto kaniya nga makapiyansa lang unta ang mga suspetsado.

Ang kasong illegal possession of explosive wala kini piyansa. Kahinumduman usab naimbargo sa mga polis gikan sa posisyon sa duha ang usa ka kalibre .38 nga revolver nga dunay unom ka mga buhing bala, usa ka kalibre .22 magnum nga dunay lima ka mga buhing bala ug usa ka hand grenade nga giingong gilabay ni Elmer ngadto sa mga polis.

Si Santos midugang nga padayon nilang gisusi ang mga background sa duha karon. (BANAT NEWS)