VM sa Dumanjug nanukmag og kapitan

CEBU, Philippines - Ang bise mayor sa lungsod sa Dumanjug gipasanginlan  nga nanukmag  sa kapitan sa barangay Candabong sa maong  lungsod  sulod  sa police  station  niadtong Sabado sa hapon.

Si Kapitan Placido  Mayonela, 44, nagkanayon  nga   gisukmag siya   ni Bise Mayor Gutrano Gica,  sa dihang nagkaabot sila diha sa sabongan sa nahisgutang barangay.

Ang barangay Candabong nagsaulog  sa ilang kapistahan niadtong  higayona.

Si Mayonela mipasangil kang Gica nga hubog niadtong higayona dihang giduol siya niini.

 â€œGipalo ko niya sa akong abaga…. unya ingon ko nga sakit giingnan man ko nga mora kuno ko’g bayot…. akong gitubag nga basin ikaw maoy bayot”, ni Mayonela pa sa phone interview niini sa The Freeman igsuong pamantalaan sa Banat News.

Matud ni Mayonela nga miadto siya sa police station aron magpa-blotter sa hitabo apan pipila ka minuto ang nakalabay si Gica miabot usab kini didto sa police station.

Matud ni Mayonela nga buot lang niyang depensahan ang iyang kaugalingon hinungdan nagpa-blotter siya sa hitabo apan giingong gisukmag hinuon siya ni Gica sa nawong.

Si Mayonela mibahad nga  mopasaka og kasong physical injury batok kang Gica karong adlawa (Lunes).

Ang hepe sa kapolisan sa lungsod nga si Senior Inspector Cesar Misola nagkanayon kini nga paesplikahon niya ang iyang mga sakop sa pagkapakyas niini og sikop kang Gica atol sa hitabo.

Si Gica sa iyang bahin, mibutyag nga adunay nahitabong panaglalis tali nila ni Mayonela ug giingong ang kapitan maoy sinugdanan sa maong bangi.

Si Gica mipasangil nga si Mayonela maoy hubog niadtong higayona ug dili siya tungod kay dili siya moinom og ilimnong makahubog.

Matud ni Gica nga miadto siya sa barangay Candabong tungod kay giimbitar siya sa kasaulogan sa kapistahan sa barangay.

Dugang sa bise mayor nga nakita niya ang kapitan kinsa niadtong higayona hubog diha sa police station ug gikomprontase niya kini.  (BANAT NEWS)