Buy bust sa CIB misikop sa 4 ka tawo

CEBU, Philippines - Upat ka tawo    ang  nasikop  sa  buy bust operation  sa  kapolisan  didto  sa   sitio Arellano, barangay San Roque,  ning  dakbayan  sa miaging  gabii.

Ang mga nasikop mao sila  si  Teresita Buangog, 52, kinsa giingong maoy subject sa maong operasyon, Joel Lahoylahoy, Romel Balbuena, 41 ug Bryan Alcantara, 24 pulos molupyo sa maong dapit.

Si Insp. Wyne Magbanua ang deputy Chief for administration sa City Intelligence Branch (CIB) mibutyag  sa Banat News nga sayo  niini nakadawat sila og tawag gikan sa usa ka informant kalabot sa pagpamaligya og  shabu ni Buangog sa maong dapit.

Hinungdan nga mipahigayon sila og surveillance  operation  ug  dihang  natino  nila  nga positibo  gyud  ang  maong   illegal nga  negosyo  ni  Buangog,  midesider  sila  sa  pagpahigayon  og  buy  bust.

Ilang gipalitan og usa ka paketi sa gituohang shabu si Buangog nga mibalor og P200.

Dihang gitunol ni Buangog ang gituohang shabu, dali  kini nilang gisikop samtang ang laing tulo ka tawo nga didto usab  sa maong  dapit kay manuyop  unta  lakip  nga gisikop sa kapolisan.

Gipadayag  ni Magbanua nga ilang nasakmit  ang  35 ka gagmay’ng paketi sa gituohang shabu  didto  sa lamesa  sa  lawak  sa  balay  ni  Buangog.

Matud pa ni Magbanua nga ila pang  gitun-an  kun asa mangompra  si Buangog  og  shabu ug  asa  usab  ang  ubang  lugar  nga  iyang  baligyaan  niini.

Samtang si Buangog sa iyang habig miangkon  nga  ang  iyang  pagbaligya  og  shabu  ginagmay ra  ug  igo  ra  nga  pangomisyon.

Wala hinuon niya  ibutyag  kun  kinsa gayud ang iyang supplier sa gituohang shabu.

Samtang ang laing tulo ka dinakpan giingong mipasangil usab nga naatlan lang sila sa dapit nga diha hinungdan nga gisikop sila   sa kapolisan. (BANAT NEWS)