Polis nga usa sa mga COPS gihimong modelo

CEBU, Philippines - Gihimong modelo ni Lapulapu City Police Office Director P/SSupt. Rey Lyndon Lawas ang iyang sakop nga nalakip sa 10 Country Outstanding Policemen in Service (COPS) sa nasud sa ulahing search nga gihimo sa Metrobank Foundation didto sa kaulohan.

Si SPO2 Rodito Viovicente sa Lapulapu Police Community Relation (PCR) maoy usa sa mga police non commission officer nga lakip sa 10 Country Outstanding Policemen of the year sa nasud. Ang maong pasidungog nakahatag   og maayong imahe sa puwersa sa kapolisan sa dakbayan sa Lapulapu.

Matud pa ni SSupt. Lawas, ikaduha na kini nga higayon nga si SPO2 Viovicente nanominar  sa maong prestihiyosong  pagkaplag  sa kapolisan nga nagtinarong sa ilang serbisyo sa katawhan. Si SPO2 Viovicente dako og nahimo sa natad sa pakigsandurot sa komunidad ilabi na sa mga kabarangayan sa dakbayan sa Lapulapu, pagpreserbar sa kalikupan pinaagi sa pagpanakop sa mga nakalapas niini sa kayutaan ug kadagatan ug ang ubay-ubay nga kalampusan sa operasyon sa illegal nga kalihukan sa dakbayan sa Lapulapu.

Sa milabay’ng tuig 2012 si SPO2 Viovicente nahilakip sa mga finalist sa pagka -most outstanding policemen nga gihimo sa Metrobank sa kaulohan.

Karong tuiga milampos  si SPO2 Viovicente sa pag-angkon sa maomg titulo gumikan sa iyang nahimo nga pagserbisyo sa kapolisan sa dakbayan sa Lapulapu.

Mapasalamaton si SPO2 Viovicente sa iyang labaw nga hatagan siya og higayon nga makita sa kapolisan ang mga butang nga iyang nahimo didto sa PNP Lapulapu. Matud pa ni SPO2 Viovicente  nga  mas mosamot ang iyang pagka aktibo sa pasidungog nga iyang nadawat ug dili kini angayan nga hugawhugawan kay lakip na siya sa mga sakop sa COPS.

Kung makasala kini dali ra kanila ang pagtangtang sa listahan sa grupo sa COPS.

Kahinumdoman nga  ang  nahilakip sa unang batch sa COPS mao si P/SSupt. Rey Lyndon Lawas diin hangtod karon mitahod pa gihapon sa mga lagda sa  COPS. (BANAT NEWS)