Bantayan island mawad-a’g elektrisidad

CEBU, Philippines - Gikabalak-an nga mawagtangan og elektrisidad ang isla sa Bantayan sa mosunod nga mga adlaw.

Si Kong. Benhur Salimbangon nibutyag nga duha na lang ka adlaw ang suplay sa krudo sa Bantayan Island Power Corporation (Bipcor) gumikan sa pagdili pagkarga sa barko sa ilang suplay.

Giingong ang Coast Guard dili na mosugot nga mokarga og lana sa barko aron malikayan ang nahitabong oil spill sa kadagatan sa lungsod sa Cordova sangputanan sa pagkalunod sa usa ka barkong de pasahero sa niaging semana.

Nadawat ni Salimbangon ang taho taliwa sa ilang panaghisgut sa problema sa elektrisidad sa gagmay’ng isla sa ikaupat nga distrito sa miaging  adlaw atol sa tigum sa Regional Development Council (RDC) 7 Sub-Committee on Power.

Ang Bipcor adunay lima ka bunker/diesel-fired power plants nga adunay kapasidad nga 8.34 megawatt. Nabalaka si Salimbangon sa maong taho sanglit daku kini og epekto sa industriya sa turismo ug pamatigayon sa isla sa Bantayan. Usa na niini ang 1.6 milyones ka itlog matag adlaw nga mamugna sa manokan sa maong lugar pinaagi sa kuryenti. Nagpatabang si Salimbangon sa buhatan ni Gob. Hilario Davide III  kay wala niya makontak ang kadagkoan sa Coast Guard. (Gregg M. Rubio/WC)

DENR7 nakakuha’g labaw sa katunga sa ilang target

Ang Department of Environment and Natural Resources sa rehiyon (DENR-7) nakakab-ot og labaw sa 50 porsiyento sa target niini sa pag-establisar sa ilang programa nga National Greening Program (NGP).

Matud pa ni Dr. Eddie Llamedo, tigpamaba sa DENR-7 nga adunay 12,413.73 ka ektarya ang gitamnan og nagkadaiyang lumad nga mga punoan sa kahoy.

Dugang pa ni Llamedo nga milapas og labaw sa katunga sa 24, 361 ka ektarya ang ilang natamnan sa ilang gi-target nga plantasyon sa Central Visayas ubos sa programang NGP.

Samtang  si DENR-7 Regional Executive Director Isabelo Montejo  nagkanayon nga sa sayo pa, ila nang gipaspasan ang ilang mga aktibidad sa pagpananom og  kahoy  sa nagkadaiyang lugar sa rehiyon aron  hinay-hinay nilang makab-ot ang ilang gi-target ning tuiga.

Gipadayag ni Montejo nga gawas sa pagpahigayon og dinagkong tree planting activity, ilang responsibilidad nga siguroon nga ang ilang mga ipananom nga mga kahoy motubo  ug molabong pinaagi  sa makanunayon nga pag-monitor niini. Base sa records gikan sa Forest Management Services (FMS), sa Agosto 15 ning tuiga, ang partial nga nakab-ot sa rehiyon nahimutang sa Sugbo nga may 4, 797 ka ektarya nga natamnan og 2, 694,106 ka seedlings; 2, 630 ka ektarya usab ang natamnan og 2, 385, 795 ka mga seedlings sa probinsya sa Bohol samtang 4, 921 ka ektarya ang natamnan og 2, 707,222 ka seedlings sa probinsya sa Negros Oriental ug 66.5 ka ektarya usab ang natamnan og 13, 303 ka seedlings sa probinsya sa Siquijor.

Dugang pa ni Montejo nga ang intensyon sa NGP nga ibalik ang mga punoan sa kahoy ngadto sa gatusan o kaliboan ka ektaryang luna diin didto sila kanhi mitubo. Tuyo sa programang NGP nga mapalambo ang maayong kalidad sa tubig sa mga kasapaan ug lakip na ang irigasyon sa tubig sa kaumahan, minusan ang dakong pagbaha ug uban pa. Sa nasayran, si Presidente Benigno Aquino III miluwat og Executive Order No. 26 sa miaging Pebrero 24, 2011 sa  pagtukod sa programang NGP. (BANAT NEWS)