Nagmagahi kaniadto karon maoy namugos makabalhin

CEBU, Philippines - Mga nagpuyo sa peligrosong lugar sa siyudad sa Mandaue nagmagahi sa pagbalhin kaniadto mao na usab karon ang nagpunay og hangyo sa kagamhanan nga kahatagan og luna nga ilang kabalhinan.

Si Casuntingan Barangay Kapitan Oscar del Castillo nga nahinabi sa Banat News niadtong miaging adlaw miingon nga suliran nila karon ang pagpangita og luna nga kabalhinan sa mga molupyo sa sitio Lub-ang nga nakasinati og pagdahili sa yuta.

Si Del Castillo miingon nga sukad pa kaniadto ilang giawhag ang mga residente sa maong dapit sa pagbiya na sa lugar tungod kay kuyaw kini sa pagdahili sa yuta panahon sa ting-uwan.

Gibutyag ni Castillo nga kaniadto duna siya’y nadawat nga report nga duna nay tawong natabunan og yuta sa maong dapit apan gihilom ra sa mga tawo tungod sa kabalakang papahawaon sila sa maong lugar.

Apan human sa pagdahili sa yuta sa miaging semana nga diin pito ka balay ang natabunan ug suwerteng walay tawo nga naangol ug namatay, gibati na karon og kahadlok ang mga residente sa lugar.

Si Tonyfet Juanico nga maoy chairman sa Housing on Urban Development Office (HUDO) sa dakbayan miingon nga nangita sila og dakong luna nga kahiklinan sa mga molupyo gikan sa sitio Lub-ang.

Kini gumikan kay ang 6.5 ka ektarya nga luna sa barangay Paknaan sa dakbayan sa Mandaue nga nahimong relocation site sa mga  informal settlers gikan sa Subangdaku, Maguikay, Banilad, Paknaan ug uban pa dili na masudlan pa og laing mopuyo.

Matud niya limitado lang sa 1,200 ka pamilya ang maong relocation site ug dili na tugutan pang may madugang niini nga mga pamilya aron di sila maghuot. (Romeo T.  Limpangog/EIM)

Laptop sud sa buhatan sa bise mayor sa Talisay gikawat

Naukay ang mga kawani diha sa buhatan sa bise mayor sa dakbayan sa Talisay human nawagtang ang laptop diha sa maong buhatan.

Sa imbestigasyon sa mga polis nga ang HP Compaq 520 T20 laptop nga dunay property number 2446 nga nagkantidad og P47,107.39 nga giisyu sa kagamhanan sa Talisay diha sa buhatan sa bise mayor ang nawagtang niadtong Lunes sa buntag.

Apan ang maong insidente gi-report sa staff sa buhatan sa bise mayor nga si Marites Na-ag ngadto sa kapolisan niadto lang Miyerkules sa hapon.

Si Na-ag nagkanayon nga niadtong Lunes pag-abot niya diha sa buhatan sa bise mayor nabantayan niya nga ang lock sa main door abli na kini ug wala na ang nahisgutang butang nga gipatong diha sa lamesa sa encoder. Giingong gipangita nila ang maong butang apan wala gyud nila kini makit-i hinungdan nga gi-report nila kini ngadto sa kapolisan.

Ang kapolisan nagpahigayon og follow-up nga imbestigasyon pagsuta kung wala bay nahitabong inside job. (Brenda D. Batuto/EIM)

Market vendor gipusil sa ilang tugkaran

Patay ang usa ka tawo nga gipusil sa wala hiilhing lalaki sa Bless Kalinga, sitio Soong, barangay Mactan, dakbayan sa Lapulapu alas- 6 pasado ang takna sa miaging gabii.

Si PO1 Jomar Querobin sa Homicide Section sa kapolisan sa maong dakbayan miila sa biktima nga mao si Demetrio Baylosis Maribao, 50, nagpuyo sa maong dapit, kinsa usa ka manindahay sa merkado publiko sa siyudad.

Duha ka wala mailhing lalaki nga giingong gikainom pa sa biktima maoy gidudahang responsable  sa pagpatay sa biktima.

Giingong uwahing nakit-ang buhi ang biktima nga nakig-estorya sa maong mga lalaki diha sa may tangkal sa ilang hayopan ug pipila ka minutos ang milabay nag-inom sila niini.

Apan mao na lay ilang nadunggan ang lanog kaayo nga butobuto sa armas ug sa pagsusi sa mga silingan nagbuy-od na ang biktima ug nagkadugo ug patay na.

Nakuha diha sa crime scene ang tulo ka mga kabhang sa bala sa armas nga kalibre  .45 ug usa ka deform slug niini, wala pay lead ang kapolisan sa motibo sa maong pagpatay. (/EIM) (BANAT NEWS)