City Hall magpabutang og tangke sa tubig

CEBU, Philippines - Human mogawas ang balita nga ang mismong Cebu City Hall building wala diay rainwater catchment sigun sa gilatid sa ordinansa, si Mayor Michael Rama mimando dayon nga tumanon kini sa labing dali nga panahon.

Matud ni Rama nga usa siya nga mimugna kaniadto sa City Ordinance 1711 dihang usa pa siya ka konsehal sa dakbayan atul sa termino ni kanhi mayor Alvin Garcia kaniadtong 1998.

Nahinumdom si Rama nga gisugyot ang maong ordinansa nila ni kanhi Konsehal Jesse Aznar, Felixberto Rosito ug Gabriel Leyson aron makatabang nga maminus-minosan ang paglunop sa dakbayan kun adunay kusog nga pag-uwan.

Apan bisan og 15 ka tuig na ang milabay gikan sa pagkamugna sa City Ordinance 1711 ang maong ordinansa wala gayud mapatuman og gani apil pa ang duha ka building sa City Hall nga wala makabutang og water catchment.

Ang pundohanan sa tubig-uwan nga gipasabot sa ordinansa dili managsama og gidak-on og ibasi kini sa gilapdon sa atup sa building nga pagatukoron.

Si Konsehal Gerardo Carillo maoy mipadangat pagbalik niining maong isyu sa sesyon sa mga konsehal kaniadtong miaging Miyerkules aron pugson na gyud ang mga tag-iya’g building nga magbutang og sawud sa uwan.

Nalipay si Carillo nga ang mayor mopahimo na usab og rainwater catchment aron dili salikwaot nga estrikto nga mopatuman sa ordinansa ang dakbayan apan utro pa kini nga malapason. (/EIM) (BANAT NEWS)