NBI wa makasikop ni Clavel

CEBU, Philippines - Napakyas  ang National Bureau of Investigation (NBI)-7 sa pagdakop nila ni kanhi congresswoman Clavel Asas-Martinez   ug  lain  pang  duha ka  tawo, kinsa  naluwatan   na  og warrant of arrest   pinaagi  sa  Sandiganbayan Second Division.   

Ang  maong  warrant  kaniadto pang  Hulyo 15, 2013  gipagawas sa Sandiganbayan  apan  niadtong  Hulyo 30 lang kini nadawat  sa NBI  ug  wa  dayon  kini  ikasilbi.

Ang  mga  akusado  nag-atubang  sa kaso  nga malversation of public funds ug anti-graft   nga  kaso.

Sa paghatud  unta  sa maong  warrant, ang  NBI   nga gipangunahan  ni   supervising agent Atty. Renan Oliva napakyas pagdakop nila ni Clavel, kanhi Bogo City Mayor Celestino “Tining” Martinez III ug kanhi municipal treasurer  nga  sa pagkakaron konsehal   Rhett Minguez  kay  wala  na  kini  sa ilang  mga  panimalay.

Unang giadto sa NBI ang Paradise Village, Talamban, diin  may mga  paryente  ang mga Martinez, giadto  usab  nila  ang    balay ni Tining sa Silver Hills, Talamban, pero wala kini didto.    Sa alas  9:00  sa buntag kagahapon  mibiya  ang  NBI  sa Talamban  ug  miadto  sa Bogo City    ug  mideretso  sila  sa balay ni Bogo City Mayor Junie Martinez,  ang bana  ni Clavel.

Gisiksik  nila  ang  balay  ni  Martinez  ug  wala  silay  nakita  niini, ug  ingon usab   si  Minguez  wala  gihapon  sa ilang  balay.

Mibiya  ang  NBI  sa Bogo  sa alas 12:30  sa udto  ug  tungod  kay  mabahas  man  ang  maong  warrant  karong  adlawa  motunol  lang  sila  og  compliance  report  ngadto  sa Sandiganbayan,  sumala  ni  Oliva.

Unya  kun  may  lain na  usab  nga  warrant  of  arrest  nga  iluwat  batok  sa  mga  dakpunon,  paningkamotan  nilang  hidakpan na  kini.

Ang kaso  nagsukad   sa giingong  dili maayong  paggasto  sa  Priority Development Assistance Fund or pork barrel in 2003  ni Clavel.    Giingon  nga  gigahin  ni  Clavel ang  P10 milyones   ngadto  sa ahensya  sa Girl  Scout of the Philippines (GSP) alang  sa   anti-drug illegal campaign apan  didto  kini  niya ideposito  sa kaugalingon  niyang  bank  account.  

Ang ubang  dakponon  mao  ang anak  ni  Clavel  nga  si   Ma. Cielo Martinez, ang  kanhi  tresurera  sa GSP, kanhi  municipal accountant Cresencio Verdida, bookkeeper Rhodariza Kilantang ug  GSP Cebu Council cashier Julieta Quino. (BANAT NEWS)