Mga way gamit nga dalan sa Talisay pasudla’g rota

CEBU, Philippines - Ang bag-ong administrasyon sa kagamhanan sa dakbayan sa Talisay nagplano og rerouting sa traysikol ug pagpagamit sa mga motorista sa mga gipanglumot-lumotan nga mga dalan aron pagsulbad sa kahuot sa trapiko diha sa kadalanan sa siyudad.

Hinuon dunay konsultasyon nga himuon una pa kini ipatuman matud pa ni Vice Mayor-elect Romeo Villarante.

Gibutyag ni Villarante nga dunay mga karsada sa Talisay nga wala magamit sa trapiko ug posibleng ilaha kini pasudlan og rota sama sa karsada dapit sa Aznar Sports Complex sa Tabunok nga molusot sa sitio  Molave nga gipuy-an na sa mga informal settlers. Gawas niini dunay laing karsada diha sa sitio Mansueto Tabunok nga lusot ngadto sa sitio Dawis, Tabunok apan wala ma-maximixe ang paggamit.

Ang bag-ong administrasyon nagplano usab sa paggama og access road paingon diha sa barangay Lagtang. Ang maong access road posibleng mosuong sa ilawom sa Mananga Bridge.

Matud ni Villarante nga ang mga traysikol gikan sa barangay Pooc ug Mohon dili na paagion sa national highway ug adto na sila molusot sa access road.

Sa laing bahin, giklaro ni Villarante nga ang City of Talisay-Traffic Operation Development Authority (CT-TODA) dili na kini ilisan og ngalan tungod kay dunay ordinansa niini.

Apan matud ni Villarante nga i-refine nila o hapsayon ang mga balaod sa trapiko ug kung dunay angayang usbon sa ordinansa usbon nila kini. Gibutyag ni Villarante nga dunay nabantayan nga mga provision sa ordinansa nga wala pa maimplementar usa niini mao ang pag-isyu sa citation tickets.

Gipasabot ni Villarante nga dunay mga components nga angayang iapil sa ordinansa ilabi na ang kabahin sa pag-institutionalize sa konsultasyon sa mga drayber, pedestrian ug commercial establishments diha sa commercial area. (BANAT NEWS)