PLDT-Smart gibanatan atol sa Labor Day

CEBU, Philippines - Gibirahan  kagahapon pagsaway ang PLDT-Smart sa duha ka managlahing Labor Day rally nga gitambongan   sa kaliboan ka mga mamumuo dinhi sa Sugbo tungod sa pagsalikway  niini  sa mando  sa Korte Suprema pagpabalik  sa  trabaho sa  mga empleyadong  gitaktak sa Digitel .

Si Jose Tomongha, president  sa Alliance Progressive Labor (APL) dinhi sa Sugbo ug representante sa labor sa Regional Tripartite Wages and Productivity Board (RTWPB) nagkanayon nga usa  ka  dakong  panamastamas  batok  sa Labaw’ng Hukmanan  sa nasud  ang  gibuhat  sa tagdumala  sa PLDT-Smart  sa pagsalikway  sa mando  niini  nga  nagpabalik  sa trabaho  sa  mga  kawani  sa Digitel.

Ang  maong rally  sa Fuente  Osmeña  gitambongan sa   mga  5,000  ka  mga  mamumuo  nga  sakop  sa 12 ka chapter sa APL, Trade Union of the Philippines (TUCP), Oriental Port Arrastre Services Corp. (Opascor), Partido ng Manggagawa, Makabayan, ug Akbayan. Sa laing  rally sa mga  mamumuo  sa dalan Colon atubangan sa Gaisano Metro, ilang gipalanog ang  ilang  suporta   ngadto  sa mga empleyado sa Digitel kinsa  gipapha  sa way  igong  hinungdan  sa tagdumala sa nahisgutang  kompaniya.

Ang mga mamumuo  nga kaalyado sa Alyansa sa mga Mamumuo sa Sugbo (AMA-Sugbo-KMU)  mipahigayon   usab  og lahi nga martsa gikan sa Fuente Osmeña padulong sa dalan Colon. Sa miaging adlaw, ang abogada sa Digitel Employees Union (DEU) nga si Atty. Virginia Suarez-Pinlac nagkanayon nga makapasubo kaayo  nga ang labing dako nga kompanya sa telecommunications nga mao ang PLDT-Smart communications nagdumili sa pagtuman sa mando sa Korte.

Ang Korte Suprema mimando sa Department of Labor and Employment (DOLE) nga pasugdan na ang Collective Bargaining Agreement (CBA) ug ang pag-reinstate sa 13 ka mga gitaktak nga mga empleyado  sa Digitel. (BANAT NEWS)