Bodyguard sa politiko gipusil kritikal

CEBU, Philippines - Kritikal ang kondisyon sa usa ka kanhi bodyguard sa politiko human kini pusila  didto sa Brgy. Babag lungsod sa Cordova  sa miaging  gabii.

Ang biktima mao si Chito Degamo, 49, ug residente sa maong dapit  ug  kanhi bodyguard sa usa ka politiko sa Talibon, Bohol.

Sa imbestigasyon sa kapolisan sa lungsod sa Cordova nasuta nga samtang  may gipalit sa usa ka tindahan si Degamo kalit kining gihunongan sa usa  ka motorsiklo nga  giluwanan  og  duha  ka  wala  hiilhing  lalaki.

Diha-diha  gipusil  kini  sa naglingkod  sa luyo  ug  nasabak  sa mga bala  ang  nagkadaiyang  bahin  sa iyang  lawas.

Dihang  nahagba  sa yuta  ang  biktima  gibiyaan  dayon  kini  sa  mga  kriminal  kinsa  mapasirit  og  padagan  sa ilang  motor.

Si Degamo  kinsa  samdan  sa   dughan ug paa dali kining gidala sa Mactan Doctors Hospital  sa talandugong  kahimtang.

Ang kapolisan sa Cordova misusi sa maong taho nga si Degamo nalambigit sa illegal nga drugas ug ang motibo sa maong pagpamusil.( /WC) (BANAT NEWS)