3 ka tulisan nasikop

CEBU, Philippines - Tulo ka mga notadong tulisan nasikop  sa kapolisan  sa Pardo didto  sa sitio  Cabangcalan,  barangay  Bulacao, dakbayan  sa Sugbo  sa miaging  gabii. Ang mga nasikop mao sila si Fredrick Sabroso, 32,  Adrian Llamedo alyas Popoy, 30, ug Jonrel Ocarisa, 17 nga pulos molupyo sa maong barangay.

Nasayran nga niadtong Lunes sa gabii, ang tulo gireport nga mitulis sa mga  cell phone, kuwarta, ug  mga  alahas sa tulo ka mga tinun-ang tag-17 anyos sa Mambaling Night High School.

Ang  mga  barangay  tanod  sa Bulacao nga  gipangulohan  ni Warren Naquiao  nga maoy gisumbongan  sa mga biktima  maoy  milihok  dayon  ug  migukod  sa  mga suspetsado.

Apan  ang maong mga  tanod gipamusil    ug  gibato  sa maong  mga suspek  ug  maayo  na lang  kay  walay  naigo  kanila.

Ang kapolisan, kinsa  nakadawat  sa maong  taho  milusad  dayon  og  hot  pursuit  operation  ug pinaagi  sa  mga  biktima  nga  maoy ilang  guide,  nasigpatan  niini  ang  mga suspetsado.

 Matud pa ni SPO1 Joel Lacson, sa Pardo Police Station  nga taud-taud na nilang gimonitor ang tulo tungod usab kay sila  maoy  responsabli sa pipila ka mga pagpanulis nga nahitabo sa maong barangay. Nasayran  usab  sa kapolisan  nga  bisan  asa  lang manulis  ang  mga  suspetsado, usahay  sa Talisay  ug  sa kasikbit  pang  lugar sa habagatan.  Nasakmit  gikan  kang Llamedo mao ang kalibre .38 revolver nga adunay upat ka bala, samtang  kalibre .357 nga adunay tulo ka bala usab  ang nasakmit gikan kang Sabroso.  (BANAT NEWS)