Talisay police palitan og mga kahimanan sa komunikasyon

CEBU, Philippines - Ang kagamhanan sa dakbayan sa Talisay   naglaraw  nga  mopalit og   mga ekipo sa komunikasyon alang sa kapolisan sa siyudad. Usa  ka resolusyon  kalabot  niini  ang  gipalabang  sa konseho  nga  nag-awhag kang Mayor Socrates Fernandez sa pagpalit og usa ka VHF/FM radio repeater system, usa ka VHF/FM radio transceiver base ug 10 ka mga unit sa VHF/FM transceiver portable nga magamit sa kapolisan.

Ang maong resolusyon     gipangamahanan  ni  Bise Mayor Alan Bucao, chairman sa committee on public order, safety, traffic management and public utilities ug chairman sa City of Talisay-Traffic Operations and Development Authority (CT-TODA).

Gipasabot ni Bucao nga ang kwerpo sa kapolisan sa siyudad maoy nagmentinar   sa kahapsay ug kalinaw ug  angay  lang   nga  pahigayonan sila  og  de kalidad  nga  klase  sa komunikasyon  tungod  sa kamahinungdanon  niini  sa ilang  serbisyo  ilabi  na  sa pagsumpo  sa kriminalidad. Matud sa bise mayor nga ang pagpa-uswag sa ekipo sa komunikasyon sa kapolisan makahatag  og dugang kalamboan sa ilang pag-alagad   sa mga Talisaynon.

Ang lakang  ni Bucao  gihimo  human  niya namatud -ang  gubaon  na  mga hand held radio sa kapolisan   busa  ang  gigamit  nila  isip  hulip  niini  mao  ang  personal  nila  nga cell phone  ilabi  na  sa panahon  nga  adunay  alarma.

Gawas niini  kuwang  usab  og  mga  sakyanan  ang  kapolisan  sa maong  dakbayan   kay  sa pagkakaron duha   ra  ka patrol car ang magbadhas   sa karsada   sa panahon  nga  may  mga alarma, check points  ug patrolya. (Brenda D. Batuto/WC) (BANAT NEWS)