PhilHealth premium ipahandos dayon

CEBU, Philippines - Gimandoan sa  Philippine Health  Insurance Corp.(PhilHealth)  ang tanang employer sa  paghandos ngadto  sa ilang  buhatan sa mga  remittance report (RF-1) niini  matag  buwan  pinaagi  sa  Electronic Premium Reporting System (ERRS).

Ang maong mando gipaagi  sa Circular No. 25-2012 ug 45-2012, aron  mas gaan  ang  pagtunol sa remittance  sa  matag  employer kon  amo  ngadto sa buhatan sa PhilHealth.   

Sumala sa  mga  opisyal  sa PhilHealth-7 nga kining bag-ong version o sistema  sa remittance, gihimo  aron  dali  ra ang paghikay  sa gitawag  nga Preliminary Employees Premium Remittance List (PEPRL) nga nagtugot  sa employer nga mahatud dayon  ang  mga  premium  sa ilang  mga  empleyado  ngadto  sa buhatan sa PhilHealth. Sa samang  higayon  dali kaayong  masayran  kun unsay  mga  problema  nga masugatan  bahin  sa mga  remittance  sa  usa ka  kompaniya  ngadto  sa PhilHealth kalabot  sa pagpasiguro  sa ilang  mga  kawani  ngadto sa maong  ahensya.

Ning  maong  sistema  dali na lang  usab alang  sa  mga  kompaniya  ang paghatud  sa  ilang bayranan  ngadto  sa buhatan  sa PhilHealth  matag  buwan.

Sa samang  higayon sayon na lang  usab  alang  sa PhilHealth  ang  pagdawat  sa  mga  bayad  gikan  mismo  sa  mga  kompaniya  o kaha  gikan  sa bangko  nga  giutorisahan  sa maong ahensya   sa  pagdawat  sa PhilHealth  contribution  gikan sa nagkalainlaing  kompaniya. (/WC) (BANAT NEWS)