P13M nga taytayan tukoron sa bukirang barangay sa Cebu City

CEBU, Philippines -  Gipahigayon na kagahapon ang groundbreaking sa P13 million nga kantidad nga tukorong taytayan nga magkonektar sa duha ka mga bukirang barangay sa siyudad sa Sugbo nga Barangay Bonbon ug Barangay Bout Taop.

Ang kapitan sa Barangay Bonbon nga si Alex Ibarita misaysay ngadto sa mga sakop sa media nga pipila na ka katuigan nga gipangandoy sa mga tawo sa ilang dapit sanglit giproblemahan gyud nila ang lisod nila nga pagdala sa mga produktong utanon paingon ngadto sa mga merkado.

Matud pa nga dili gyud kalabang ang mga taga Bout-Taup paingon sa laing barangay kung taas ang tubig busa naapektohan usab ang mga tawo nga nagtrabaho ug mga estudyante gumikan kay maka-absent sila sa panahon nga kusog ang bunok sa uwan.

Nagkanayon ang kapitan  nga giganihan na og budget ang maong proyekto niadto pang 2009 ni kanhi Kongresista Antonio Cuenco apan nahilom ra usab kini gumikan kay padulong mahuman niadtong higayona ang termino ni Cuenco ug nipuli si Kongresista Tomas Osmeña.

Apan si Mayor Michael Rama maoy nipadayon sa maong proyekto ug gibana-bana kini nga mahuman sulod sa unom ka buwan.

Miuban usab sa groundbreaking kagahapon mao si Konsehal Edgardo Labella kinsa maoy kandidato pagka-bise mayor sa Team Rama.

Gipadayag ni Rama nga wala niya igsapayan kun dako ang nagahin sa siyudad sa maong proyekto bisan pa man nga gamay ra ang populasyon sa nahisgutan nga mga  Bonbon gumikan ang importante kaniya nga dili maglisod pag-agi ang mga tawo sa maong dapit panahon sa uwan ug maagian usab kini og sakyanan sa higayon nga mahuman na ang maong proyekto.   (BANAT NEWS)