Red plate nga sakyanan gigamit sa pamolitika?

CEBU, Philippines - Ang Cebu City Hall nakadawat og daghang report nga dunay mga sakyanan sa kagamhanan nga gigamit sa personal nga katuyoan, apil na sa pamolitika.

Mga tinugyanan sa City Hall-General Service Office (GSO) miingon nga ang mga sakyanan sa dakbayan dali ra nga mailhan kay gibutangan kini og logo sa City Hall.

Nabantayan hinoon sa mga reporters nga ang ubang sakyanan sa City Hall nga giisyu sa mga kapitan sa barangay wala pa kabutangi og mga logo aron mailhan kini nga iya sa dakbayan.

Usa ka copy editor sa The Freeman, nakakita kagahapon og usa ka puti nga Toyota Hilux nga iya sa Cebu City government nga gisakyan og tawo nga nagsul-ob og puti nga uniporme ug misulod sa usa ka ospital.

Matud niini nga klaro kaayo nga nagdali ang nagsakay sa sakyanan kay paspas ang pagpadagan sa drayber ug diriyot mabag-iri ang iyang kotse.

Gisunod sa maong tigbalita ang maong Hilux nga sakyanan ug didto kini misulod sa Visayas Community Hospital. Gituohan niya nga usa ka doktor ang maong tawo nga nagsul-ob og puti nga uniporme.

Napakyas hinuon siya sa pagtimaan sa plate number sa sakyanan kay mikilab lang kini sa pagsibat human mahatud ang sakay didto sa compound sa ospital.

Samtang mga kawani sa DYLA nakabantay usab og laing puti nga sakyanan – usa ka Toyota Revo nga gisakay-sakayan sa mga nagdumala sa programa sa radyo sa usa ka lokal nga partido sa politika.

Nasuta nga ang maong sakyanan giisyu ngadto sa usa ka opisina sa usa ka konsehal sa maong partido. Kini miawhag sa media nga mao usab untay buhaton niini kung dunay susamang kahiwian ang kaatbang nilang partido.

Ang Commission on Audit (COA) milatid nga ang mga sakyanan nga iya sa kagamhanan gamiton lang gyud sa public service purpose.

Ang maong konsehal mipasalig nga iyang susihon ang maong report nga gigamit ang iyang isyu nga sakyanan sa mga magsisibya nga nagdumala sa matag hapon nga programa-politikal. (BANAT NEWS)