Balay girapido sa Bogo

CEBU, Philippines - Girapido ang pinuy-anan sa retiradong polis nga bodyguard ni Kongresista Benhur Salimbangon sa kwatro distrito sa Sugbo sa Purok Rosal, barangay Gairan siyudad sa Bogo kagahapon sa alas 4:30 sa kaadlawon.

Ang panimay nga target sa pagpamusil gipanag-iya sa ginikanan ni Ret. SPO4 Jose Nonette Medrano nga nagpuyo ra usab tupad sa maong lugar.

Tulo ka mga lalaking sakay og motorsiklo ang gitumbok nga responsable sa maong pagpangatake apan walay gika-report nga naigo.

Matud ni PO3 Edwin Dignos, imbestigador sa Bogo City Police dihang nahinabi sa Banat News natusaktusak sa bala ang balay nga gipuy-an na sa igsuon ni Medrano nga si Escanilla Medrano, 53.

Atol sa pagsukitsukit sa kapulisan gitug-an ni Rossana nga samtang didto siya sa kusina nabantayan niining may mihunong nga motorsiklo nga may tulo ka tawong nag-angkasay.

Sumala pa nga ang duha ka angkas nanganaog ug mirakrak sa panimalay hinungdan nga mihupo na lang si Escanilla sa sawog. Human niini nangikyas ang mga gikatahapan.

Sa pakisusi sa kapulisan nasuta nga bugtong ang haligi sa terrace sa pinuy-anan niini ang naigo ingon man bungbong. Nakakuha usab og mga basiyo sa bala sa kalibre .45 ug slugs ang mga imbestigador.

Ang kapulisan padayon pa sa ilang imbestigasyon pagtumbok si kinsa ang mga gikatahapan. Nasayran nga wala pay tuig gikan miretiro sa katungdanan si Medrano kinsa gikuhang bodyguard ni Salimbangon. ( /EIM)