Koreana ug kolektor gitulis

CEBU, Philippines - Nawad-an sa iyang salapi ug mga mahinungdanong butang ang usa ka Koreana human lungkaba ang lawak sa gipuy-an niining apartment didto sa sitio Tabay, sa barangay Labogon, dakbayan sa Mandaue sa miaging kaadlawon.

Ang biktima mao si Yiyeran Skim, 24, dalaga ug temporaryo nga nagpuyo sa maong dapit samtang ang suspetsado nga naglungkab mao ang duha ka bayong-bayong nga giingong silingan lamang usab niini.

Si PO3 Heraclio Gamboa sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News            mibutyag nga ang nasakiyo sa mga  kawatan mao ang traveling bag sa biktima nga puno sa mga senina niini, P3,000 nga salapi, $60, ug 40,000 usab nga Korean money.

Matud pa ni PO3 Gamboa nga nahinanok pag-ayo ang biktima dihang nakasulod ang mga kawatan pinaagi sa pagguba  sa kandado sa pultahan sa lawak niini. Padayon pang gipangita sa kapolisan ang nailhan nilang mga kawatan nga miamong-among sa mga salapi ug mga butang sa biktima.

Samtang usa ka kolektor sa lending firm nasakiyohan usab og wala matinong kantidad sa salapi human kini tulisa sa wala hiilhing tulisan nga de motor didto sa sitio Kawasan, barangay San Roque, lungsod sa Liloan sa miaging hapon.

Ang biktima mao si Ma. Thelma Dosdos, 28, minyo nga taga barangay Cotcot sa maong lungsod.

Matud pa ni PO1 Jose Ahron Ortega sa Liloan Police Station nga gikan pang nangolekta sa ilang mga suki sa bukirang barangay sa Liloan ang biktima dihang kalit kining gibabagan sa usa ka motorsiklo nga gisakyan og duha ka armadong mga lalaki. Matud pa sa biktima nga nanaog ang backrider sa maong motorsiklo ug miduol kaniya uban ang pagdeklarar nga tulis.

Gumikan sa kabalaka nga pusilon siya niini, gitunol niya ang shoulder bag nga gisudlan sa iyang koleksyon nga wala niya masuta ang kantidad. Sa pagkakaron padayon pang gipangita sa kapolisan ang mga tulisan. (FREEMAN)