Taga T. Padilla mihangyo ni Rama

CEBU, Philippines - Kagatosan ka mga molupyo sa Barangay T. Padilla, dakbayan sa Sugbo ang nagpanon ngadto sa   buhatan ni Mayor Michael Rama kagahapon ug mihangyo sa mayor nga ipapalit ang yuta nga ilang gipuy-an karon kay bawion na kuno kini sa tag-iya.

Matud pa sa   pangulo sa Nasudnong Katawhang Kabos (Nakabos) nga si Evangeline Abejo nga bisan nga nakaginhawa na ang 29 ka pamilya kinsa gihatagan og unom ka buwan nga extension ni Judge Estella Alma Singco sa Regonal Trial Court -Branch 12, apan nagkinahanglan pa gyud sila og kasiguroan nga dili sila mapapahawa gikan sa maong luna.

Hinuon mipasalig ang mayor nga iyang paningkamotan nga masulbad ang maong problema hinungdan nga nalipay ang maong mga molupyo nga migawas sa buhatan   ni Mayor Rama human sa ilang panag-estorya si Rama diha-diha mimando kang manlalaban Collin Rosell   kinsa maoy hepe   sa Division for the Welfare of the Urban Poor (DWUP) nga pangitaan og paagi nga mapalit ang maong luna.

Si Collen mihimo na og lakang sa pagsusi sa maong lugar nga nahisgotan ug iyang nasayran nga nahisakop kini sa socialized housing site base sa survey sa tibuok T. Padilla niadtong 1997.

Ang urban poor group sa T. Padilla nagmalaumon nga makaangkon og positibong resulta niini.

Nakita sa maong grupo ang bugtong solusyon sa ilang problema busa nagtuo sila nga dili magpanuko ang kagamhanan sa dakbayan sa pagpalit niining maong luna nga may gidak-on nga mokabat sa 4,834 metro kuwadrado.

Kung mahikay na kini sa DWUP ila kining iduso sa konseho aron maaprobahan ang budget nga ipalit ning maong luna. (BANAT NEWS)