Parada sa mga iro sa Mactan Shrine

CEBU, Philippines - Ang pagsaulog sa Valentine’s Day sa bulan sa Pebrero sa matag tuig dili lamang alang sa mga tawo o sa mahal sa kinabuhi niini kun dili lakip na usab sa mga iro nga giisip nga “man’s best friend.”

Ang D’ Dog House Café ug Grooming Salon ug giabagan usab sa kagamhanan sa dakbayan sa Lapulapu molusad og Valentine’s Day festival alang sa mga iro karong Pebrero 26 sugod alas-6 sa buntag hangtod sa alas-9 sa gabii.

Kini ipahigayon sa Mactan Shrine sa barangay Mactan sa dakbayan sa Lapulapu nga gipaabot nga apilan sa mga nagkadaiyang canine lovers.

Naglakip sa mga kalihokan sa adlaw sa maong kasaulogan mao ang Free Clinic sa alas-8 sa buntag nga naglakip sa anti-rabies vaccination ug ingon man pagpanghatag og bitamina, pagpangapon ug uban pa.

Dugang kalihokan nga pagahimoon sa alas 2 sa hapon sa maong adlaw ang presentasyon sa mga dog clubs, grooming lectures ug ingon man paghatag og pasidungog sa mga mananaug. Aduna say himuong mini-float contest sa dog parade sayo sa buntag sa maong adlaw. (BANAT NEWS)