Mga Kapitan sa brgy. gihataga'g multicab

CEBU, Philippines - Mikabat sa 17 ka mga multicab ang gi-apud-apod ni Governor  Gwendolyn Garcia ngadto sa mga barangay kapitan sa lungsod sa Dumanjug atol sa iyang pagbisita sa maong lungsod sa miaging semana.

Matud pa sa gobernador nga ang maong mga multicab iyang gihatag sa matag barangay aron magamit kini sa bisan  unsang kalihokan nga ikaayo sa katawhan sa barangay.

Sagad sa nakadawat sa maong mga multicab mao ang mga barangay kapitan sa mga bukirang bahin sa Dumanjug.

Si Mayor Nelson Garcia sa maong lungsod mao mismo ang nangayo sa maong mga multicab kay nasayud siya sa kamahinungdanon niini ilabi na sa panahon sa mga emerhensya sama sa paghakot sa   masakiton sa ilang barangay nga buot magpahatod ngadto sa tambalanan.

Gumikan niini gihangop pag-ayo sa mga barangay kapitan ang maong gasa sa kagamhanan sa lalawigan ug mipadangat sila sa kinasing -kasing nilang pasalamat ngadto sa gobernador

Gawas sa mga multicab, ang gobernador mitunol usab ngadto sa dul-ang 600 ka mga barangay tanod sa ilang honorarium gikan sa kagamhanan sa lalawigan .

Sa samang higayon   giapud-apod usab sa gobernador ang 11 ka mga kanding ngadto sa taga barangay Tubod, ug Bitoon kinsa gitahasan sa gobernador sa pagpasanay niini. Ang matag anak sa maong mga kanding ipabuhi usab   sa magkinahanglan niini sa tibuok lungsod sa Dumanjug.  - BANAT NEWS