Duha naghikog gumikan sa ilang mga balatian

CEBU, Philippines - Duha ka tawo ang naghikog tungod sa gihambin nga sakit, ug ang usa niini nagpusil sa iyang kaugalingon sa managlahing lugar dinhi sa dakbayan ug probinsya sa Sugbo niadtong Martes ug kagahapon sa buntag.

Si Arsenio Navasca, 40, ulitawo ug nagpuyo sa sitio Sto Niño sa barangay Mantayupan sa lungsod sa Barili nagpusil sa tuong ulo ug milapos ang bala sa pikas nga bahin sa ulo pinaagi sa .38 paltik revolver sulod sa ilang payag niadtong Martes sa buntag.

Segun sa kapolisan nga sa wala pa maghikog, si Navasca nakigsawo pa og pamahaw uban sa iyang mga ginikanan sa ilang balay ug pagkahuman og kaon walay tingog-tingog ug mideretso sa payag nga may 50 metros ang distansya gikan sa ilang balay.

Apan nianang pasado alas-11:00 sa buntag kalit lang nadungog sa uyoan niining si Philip Navasca ang usa ka sipang buto sa armas gikan sa payag hinungdan nga gisusi dayon niini ang payag ug maoy iyang nakita   ang nagbuy-od nga lawas sa iyang pag-umangkon nga may samad pinusilan sa ulo ug patay na.

Si SPO1 Arturo Andales sa Barili Police Station miingon nga ilang nahinabi ang amahan ug uyoan ni Navasca ug kini mibutyag nga taud-taod nang nagmulo sa tiyan si Arsenio tungod sa pagkapalahubog niini.

Samtang sa laing bahin si Rosela Cabigon, 61, biyuda naghikog usab pinaagi sa pagbitay og pisi sulod sa iyang lawak sa balay niini didto sa F. Pacaña St., sa barangay Tisa ning siyudad sa Sugbo kagahapon sa buntag.

Ang nakadiskobre niini mao ang iyang umagad nga si Lorna. Si PO3 Ruth Violango, imbestigador sa Homicide Section sa Cebu City Police Office (CCPO) nagkanayon nga sa ilang pasiunang pakisusi gihapinan og panyo ang pisi dapit sa liog niini.

Nasuta usab nila nga may sakit nga diabetes si Rosela ug gani naputlan na kini sa iyang wala nga tiil.

Napunitan usab sa kapolisan ang suicide note niini nga nangayo og pasaylo sa iyang mga anak uban sa panugon nga ipasusi ang iyang yuta sa City Hall. (BANAT NEWS)