Hapon natuk-an sa pan patay

CEBU, Philippines - Namatay ang usa ka Japanese national human kini aksidenteng natuk-an sa gikaong pan kauban ang iyang Filipina nga kapuyo diha sa ilang pinuy-anan sa Sto. Tomas Village barangay Tuburan Sur siyudad sa Danao niadtong Miyerkules sa alas 8:00 sa gabii.

Ang patay nang nadangat sa tambalanan mao si Hirotaka Kato, 69, dunay kapuyo nga si Revelyn Rica, ug anaa sila magpuyo sa nahisgutang lugar.

Matud ni PO1 Faron Avila, desk officer sa Danao City Police Station nga nakahinabi sa Banat News kalit naglisod sa pagginhawa ug wala na makatingog pa si Kato human mihamong sa usa ka pan. Daling nangayo og panabang ang kapuyo sa ilang mga kaubanan sa panimalay ug gihatud dayun kini sa Danao City District Hospital apan gideklarar kini sa mga doktor nga patay na. 

Ang kapulisan padayon pa sa ilang imbestigasiyon sa maong panghitabo pagtino kun wala bay foul play sa kamatayon tungod kay dili sila dayon motuong ang pagkaon sa pan nga nakaingon nga kini natuk-an maoy nakapatay niini. (/EIM)   - (BANAT NEWS)