Danajon Bank summit gipahigayon dinhi

CEBU, Philippines - Aron sa pagpreserba sa Danajon Bank , usa ka summit nga gitawag nga First Danajon Bank Summit gipahigayon sugod kagahapon hangtod sa Biyernes, Enero 20 , 2012 sa Marco Polo Plaza Hotel sa barangay Lahug, dakbayan sa Sugbo.

Ang maong kalihukan gipasiugdahan sa Coastal Conservation & Education Foundation (CCEF) nga usa ka inilang lider sa Coastal Resource Management nga suportado usab sa U.S. Agency for International Development (USAID).

Ang Danajon Bank sa probinsiya sa Bohol maoy usa sa mga labing dako nga “takot” o mabaw’ng bahin sa taliwala sa dakong lawod sa dagat nga puno sa isda sa tibuok kalibutan nga makita dinhi sa Pilipinas.

Ang tema niining maong panagtagbo mao ang “Collaborating Efforts for a Shared Resources”.

Ang mga motambong sa maong summit naglangkob sa mga opisyal sa kagamhanan sa 19 ka mga lungsod, siyudad, ug lalawigan sa Bohol, Leyte ug Southern Leyte.

Kauban usab nga motambong ang mga opisyal sa nagkalainlaing ahensya sa nasudnong kagamhanan sama sa National Economic Development Authority (NEDA), Bureau of Fisheries and Aquatic Resources (BFAR), Department of Environment and Natural Resources (DENR), non-government organizations ug academic institutions.

Usa sa mga adbokasiya sa CCEF mao ang bahin sa malungtarong kabaybayonan ug kadagatan nga anaa sa nagkalainlaing komunidad sa nasud.

Ang mga organizer   ning maong panagtagbo nanghinaot nga mohatag og suporta ang tanang mga hingtungdang opisyal sa kagamhanan sa pagprotiher sa Danajon Bank batok sa mga abusador nga mangingisda.  - BANAT NEWS