60 ka opisyal mieskuyla sa PCL Academy

CEBU, Philippines - Mikabat sa 60 ka mga lokal nga opisyal dinhi sa lalawigan sa Sugbo ang mi-eskuyla sa PCL Academy, usa ka programa sa Philippine Councilors League (PCL) nga naumol dili pa lamang dugay.

Si konsehal Ronald Carcellar sa lungsod sa Poro, Isla sa Camotes kinsa maoy PCL Executive Vice President miingon nga ang 60 ka mga lokal nga opisyal dinhi sa Sugbo gikatakdang mo-graduate na sa sunod tuig.

Matud pa ni Carcellar nga ilang kaabag sa PCL Academy mao ang University of Makati ug Lyceum University sa Dagupan kinsa nagtinguha nga mas molapad pa ang kasinatian ug maantigohan sa maong mga estudyanteng konsehal sa ilang pagdumala sa tagsatagsa ka lungsod nga ilang gialagaran.

Midugang si Carcellar nga ang pag-abli sa maong kurso usa kini sa mga pilot area sa PCL Academy kansang klase gihimo sa adlaw nga Sabado ug Domingo didto sa Cebu International Convention Center (CICC) sa siyudad sa Mandaue aron dili usab mabalda ang ilang pagsilbi sa publiko.

Matud pa ni Carcellar nga ang 60 ka mga opisyal naglangkob sa mga konsehal sa lungsod; vice mayor; mayor ug mga provincial board member dili lang dinhi sa Sugbo kun dili lakip na usab sa silingang probinsiya nga gustong mohuman sa ilang Baccalaureate course ug masters’ degree.

Nasayran nga una kining higayon sa PCL nga mihimo niining maong programa sa tibuok nasud aron kahatagan og dakong bintaha ug katakos ang mga opisyal sa pagdumala ug pagpanday sa balaod sa ilang tagsa- tagsa ka lugar.

Usa sa mitungha sa Baccalaureate degree major in Political Science mao si konsehal Venesa “Alma Moreno” Salic sa dakbayan sa Parañaque ug uban pang mga opisyal dinhi sa Sugbo.  (BANATNEWS)