Duaw Santo Niño himuon sa Leyte

CEBU, Philippines -  Ang imahen sa Santo Niño de Cebu gikatakdang mobiyahe karong Oktubre 21-22, 2011 aron mobisita ngadto sa Saint Therese Diocesan Shrine sa Calubian, Leyte .

Ang maong kalihukan gitawag og “Duaw Santo Niño” nga tulo ka tuig nang gihimo.

Ang Duaw Santo Niño tuyo sa Basilica del Santo Niño sa pag-promote sa stewardship sa katawhan matud ni Padre Tito Soquiño, executive director sa Basilica del Santo Niño de Cebu Agustinian Social Development Foundation Inc.

Sa press conference nga gipahigayon kagahapon diha sa Basilica, si Padre Soquiño nagkanayon nga ang konsepto sa Duaw mao nga ang Santo Niño moadto sa mga isla sama sa gibuhat kaniadto 490 na ka tuig ang nakalabay.

Kining maong mga tuiga mao ang mga adlaw nga gisangyaw ang Kristiyanismo sa tibuok kalibutan. Lakip sa tumong sa nahisgutang Duaw mao ang pag-awhag sa publiko pinaagi sa ebanghelyo sa kamahinungdanon sa pagmahal sa kinaiyahan tungod sa epekto sa climate change.

Si Rey Martinez, founding chairman sa Saint Therese Diocesan Shrine nagkanayon nga dunay ipahigayong environmental-related symposium, film showing kabahin sa sitwasyon sa ubang mga marine resources sa nasud, coastal cleanup nga pangulohan sa Knight-Stewards of the Sea, Inc. (Seaknights), medical mission ug uban pa atol sa duha ka adlaw nga duaw.

Ang imahen sa Balaang Bata gikatakdang mobiya sa Basilica human sa Santos nga Misa sa alas 7:00 sa gabii sa Oktubre 20, 2011 diin iprusisyon kini agi diha sa Malacañang sa Sugbo.

Sayo sa buntag sa sunod adlaw ang imahen isakay sa barko sa Philippine Navy diin saludohan pinaagi sa passing military naval honor parade and review samtang molabay diha sa naval port.

Ang Philippine Navy maoy mo-host sa pagbisita sa imahen ngadto sa Calubian isip nga ang Santo Niño usa ka “Lord Admiral of the Sea.”

Sa laing bahin, ang organizer sa kalihukan nagkanayon nga bukas kini alang sa debotos nga gikan sa Sugbo.

Si Mayor Joy Roble sa Hilongos, Leyte ug co-owner sa Roble Shipping nagkanayon nga sa Oktubre 21, 2011, ang M/V Blessed Star morota ngadto sa Biliran (ang Biliran atbang sa Calubian) imbes sa ilang naandang rota sa Catbalugan aron ma-accommodate ang buot nga mosalmot sa relihiyosong kalihukan.

Mao na kini ang ikatulong higayon nga mogawas sa Basilica ang imahen aron moadto sa ubang dapit apan mao pa kini ang labing unang higayon sa modernong panahon nga mobiya kini sa probinsiya sa Sugbo.

Lakip sa giplanuhang bisitahon sa Duaw ang isla sa Limasawa sa Leyte diin gipahigayon ang labing unang Santos nga Misa sa panahon sa Katsila. (BANATNEWS)