Alvariño gikondenar

CEBU, Philippines - Pormal na nga miluwat og position letter ang mga reporter nga sakop sa kapunongang Defense PNP Press Corps (DEPP) nga nagkondenar sa pagpanghadlok nga gihimo ni kanhi Regional Director Adrian Alvariño sa Philippine Drug Enforcement Agency (PDEA) – 7 ngadto sa mga tigbalita sa Sugbo.

Ang maong position letter nahulma human hasia ni Alvariño ang usa sa mga miyembro sa DEPP nga si Rey Pasaporte bahin sa gibalita niining pabawon nga P800 mil kang Alvariño nga migawas sa Banat News sa miaging Septembre 24, 2011.

Si Pasaporte sa iyang bahin mibutyag nga una niya suwata ang maong balita gisukit niya si Alvariño unsay iyang ikasulti sa maong pasangil.

Apan matud pa ni Pasaporte nga wala mohatag og gibug-aton sa maong isyu si Alvariño ug wa usab kini moluwat og panghimakak sa maong pasangil.

Apan dihang migawas na ang maong balita giingong nasuko si Alvariño nga nakaaghat kang Pasaporte sa pagtawag sa maong opisyal sa PDEA   sa maong adlaw nga migawas ang maong balita.

Gibutyag ni Pasaporte ang nadawat niyang kinasuko nga pulong ni Alvariño sa ilang panag-estorya pinaagi   sa telepono nga nagkanayon “Tandaan mo yan (Pasaporte) ha? Babalikan kita dyan.”

Human sa maong pakighinabi, miingon si Pasaporte nga gisundan dayon kini ni Alvariño og usa ka text message nga nagkanayon “pacensyahan nalang tayo.”

Ang mga pamulong ug text message ni Alvariño kang Pasaporte nakahatag og kahadlok ug kabalaka sa naulahi.

Alang ni Pasaporte iya lang gibuhat ang iyang trabaho ug gani ang ubang   mga reporter, misuway og kuha sa pamahayag ni Alvariño apan wala silay nakuha nga pamahayag niini kay milikay kini kanila.

Gumikan sa dili maayong taras nga gipakita ni Alvariño sa usa sa mga sakop sa media sa Sugbo, ang tanang miyembro sa DEPP hingpit nga mikondenar sa pagpanghadlok nga gihimo sa dakong opisyal sa PDEA.

Sa maong position letter dili lamang si Pasaporte maoy gihadlok ni Alvariño kundili nahilakip na niini ang tanang mga tigbalita nga nadestino sa mga buhatan sa kapolisan.           

Gipasabot sa maong position letter nga isip usa ka public official, angay unta nga si Alvariño nga motubag sa mga counter-clarification mahitungod sa mga issue nga may labot sa iyang trabaho ug dili angay mopadala og mga text message nga manghulga sa mga tigbalita.

“Alvariño should consider himself as a subject of public scrutiny and accountability of every act he may do in the government”, tipik sa maong suwat.

Personal nga gitunol sa mga miyembro sa DEPP kang Alvariño ang maong position letter kagahapon sa pagpanguna sa Presidente niini nga si Chito Aragon (CDN-DYLA), Bise Presidente Arnold Bustamante (TV-5 – DYHP) ug ni Pasaporte.

Si Alvariño sa iyang bahin nagplano na nga mopasaka og kasong libelo batok kang Pasaporte ug sa ubang mga reporter nga mipagawas sa maong balita. (WC) (BANATNEWS)