Buktot Nanglugos Priso

CEBU, Philippines - Gikatakdang pasakaan og kaso karong adlawa ang usa ka buktot kinsa gipasanginlang nanglugos sa 27-anyos nga dalaga didto sa lungsod sa Balamban niadtong Biyernes sa hapon.

Ang suspetsado mao si Teofisto Algabre, 47, adunay kapuyo, residente sa maong dapit ug usa ka drayber sa traysikad.

Si Algabre nasikop sa kapolisan   didto sa merkado publiko sa barangay Poblacion sa gipahigayong hot pursuit operation.

Si SPO1 Julius Obañana sa Toledo Police Station mibutyag nga ang biktima sa wala pa mahitabo ang pagpanglugos didto sa sulod sa ilang balay nga nag-inusara dihang si Algabre giingong kalit lang misulod.

Niadtong higayona ang dalaga nag-andam sa ilang panihapon samtang naghuwat sa iyang inahan kinsa adunay gilakaw.

Giingong gigunitan sa suspetsado ang duha ka bukton sa biktima ug gihulga kining patyon.

Ang biktima kinsa gamayon rang pagkababaye   misuway sa pagsukol sa suspetsado apan wala kini nahimo tungod kay gilupig siya sa kusog.

Human sa maong hitabo si Algabre giingong misuway sa pag-ikyas apan ang mga residente sa lugar kinsa nakakita kaniya diha sulod sa usa ka tindahan sa merkado daling mi-report ngadto sa mga polis.

Giingong aduna pay laing nabiktima si Algabre apan wala kini mopasaka og reklamo batok sa suspetsado.

Sa pagkakaron nagkagulkol siya sa prisohan sa dakbayan sa Toledo. - THE FREEMAN