Prov'l Board motuki sa problema sa MCC

CEBU, Philippines - Gitakdang magtagbo karong adlawa sa regular session sa hunta probinsiyal ang presidente sa Mandaue City College sa Tipolo campus nga si Dr. Paulus Marie Cañete ug Mayor Jonas Cortes uban sa mga opisyal sa Commission on Higher Education (CHED) 7 ug Phillippine Regulation Commission (PRC) 7.

Kini human sila ipatawag sa mga sakop sa hunta probinsyal aron tukion ang bahin sa suliran sa MCC nga gidumala ni Cañete.

Usa sa problema ning maong eskuylahan mao ang kakuwang sa akreditasyon hinungdan nga dili tugotan sa PRC 7 ang mga estudyante niini sa pagkuha og Lincensing Examination for Teachers (LET) karong Septiyembre niining tuiga.

Sayo niini si Board Member Thadeo Ouano sa ika-unom nga distrito sa lalawigan sa Sugbo mipalabang og resulosyon nga nag-awhag sa committee on education sa senado ug house of representatives nga mopahigayon og house inquiry nga magtuki sa   suliran sa MCC nga gidumala ni Cañete.

Gipasabot ni Ouano sa iyang resolusyon nga nagkinahanglan kaayo nga kahatagan og pagtagad ang   maong problema gumikan kay naapektohan man ang mga estudyante niini.

Si 6th District Congressman Gabriel Luis Quisumbing nga nahinabi sa mga tigabalita miingon nga mohimo siya’g lakang sa pagsulbad niini.

Matud pa niya nga midangop sa iyang buhatan ang mga apektadong tinun-an kinsa human makalampos sa ilang kurso sa edukasyon, pakyas gihapon kay dili man sila makakuha og LET.

Si Quisumbing miingon nga sa pagbalik niya ngadto sa kaulohan makigtagbo siya sa mga kadagkoan sa central office sa CHED.

Gitataw ni Quisumbing nga naluoy siya sa gidangatan sa mga estudyante ug labaw sa tanan ang mga ginikanan niini kinsa walay laing gidamgo gawas sa kalamposan sa ilang mga anak.  - BANAT NEWS