Tanod nakuhaa'g shabu sa checkpoint

CEBU, Philippines -  Usa ka barangay tanod sa lungsod sa Barili ang nakuhaan og daghang mga pinaketeng gidudahang shabu sa checkpoint sa barangay Arpili lungsod sa Balamban niadtong Martes sa alas 5:00 sa hapon.

Ang nadakpan mao si Ceriaco Labajo, 30, molupyo ug tanod sa barangay Campanga lungsod sa Barili.

Ang hepe sa kapulisan Supt. Anthony Bagarinao maoy nangulo sa gipahigayong checkpoint sa maong lugar dihang ang suspetsado nahiagi sa maong lugar paingon sa siyudad sa Toledo.

Dihang duol na ang suspek nakabantay kini sa checkpoint ug kalit nga mihunong ug misuway og balik sa agi apan nabantayan kini ug nababagan sa ubang mga polis nga nag-atang sa unahan nga bahin.

Dihang naapiki na ang suspek kalit nga gilabay niini sa daplin sa karsada ang usa ka plastic nga maoy nakapaduda sa mga polis hinungdan nga gisukitsukit kini.

Ang mga polis daling misubay sa dapit diin gilabay sa suspek ang plastic ug dihang ilang nakit-an duna diay kini sulod nga 16 ka gagmay’ng pakete nga gituohang shabu ug kwarta nga P1,160.00.

Apil sa gi-hold sa kapulisan ang Honda XRM nga motorsiklo sa suspek dunay plaka nga 454-IGC ug gitanggong usab ang suspek alang sa pagpasaka og tukmang sumbong. (BANAT NEWS)