Tindero napusilan angol

CEBU, Philippines- Naangol ang usa ka 21 anyos nga lalaki human kini pusila sa wala hiilhing kriminal didto sa pultahan sa usa ka internetan sa sitio Kabigon, barangay Sambag Uno, ning dakbayan sa Sugbo sa miaging gabii. Ang biktima mao si Ardie King, 21, ulitawong may kapuyo, sa P.del Rosario Extention ug tindero sa Unitop sa dalan Osmeña boulevard.

Si PO3 Julius Mabunay sa Homicide Section sa Cebu City Police Office (CCPO) nga nahinabi sa Banat News nagkanayon nga nagbarog-barog ang biktima gawas sa internetan sa nahitaboan dihang kalit lang miabot ang wala hiilhing kriminal ug miluthang sa biktima.

Bisan tuod og samaran ang dughan nakadagan pa kini ug nakauli sa ilang balay ug gihatod dayon sa iyang kabanay ngadto sa Cebu City Medical Center.

Ang biktima mitug-an sa kapolisan nga nagtuo kini nga ang mipusil kaniya mao ra usab ang mikulata sa iyang higala nga si ‘Ikyod’ sa miaging adlaw. Sa pagkakaron padayon pang gipangita sa kapolisan ang kriminal.   (BANAT NEWS)