Mga batan-on tudlo-an kabahin sa agrikultura

CEBU, Philippines - Ang mga pampublikong tunghaan maoy plano ni City Agriculturist Joelito Baclayon nga himuong pilot area alang sa programa nila kabahin sa agrikultura diin tudloan nila ang mga tinun-an sa saktong pag-atiman sa mga tanom ilabi na sa mga utanon.

Suma pa ni Baclayon nga kinahanglan nga magtuon usab ang mga batan-on sa basic nga pagpananom sanglit usa kini ka alternatibo nga pamaagi sa higayon nga maglisod sila og sulod og trabaho ingon man usab nga malikayan ang pagkaminos sa mga mag-uuma sa kabukiran.

“Makig-cooperate mi sa DPED alang sa maong programa kay importante usab kaayo nga dunay kaalam ang mga kabatan-onan sa pagpananom,” matud pa ni Baclayon. Matud niya nga kung magkatiguwang ang mga mag-uuma , importante nga duna na’y mosunod nga mga tawo nga nakat-on sa ilang abilidad.

Dugang pa niya nga ang mag-uuma maoy tinubdan sa mga pagkaon busa kinahanglan nga dunay mahibaw-an ang mga kabatan-onan sa industriya sa agrikultura. Human sa nagkadaiyang lecture ngadto sa mga tinun-an, isunod dayon nila ang “out of school youth”. (BANAT NEWS)