Lacson sikupon

CEBU, Philippines - Andam ang kapulisan sa lalawigan pagsikop kang Senador Panfilo Lacson sa higayon nga kini masigpatan dinhi.

Si Sr. Supt. Erson Digal, hepe sa kapulisan sa lalawigan mitug-an sa mga tigbalita nga kun ugaling makit-an sa iyang mga sakop ang senador kun makit-an sa ilang mga lugar dili sila magpanuko sa pagsikop niini sanglit duna kini warrant of arrest sa kasong murder.

Si Digal misalikway hinuon sa report nga nakit-an si Lacson sa lungsod sa Badian apan sa dihang gisusi na sa hepe ang usa sa mga inilang beach resort sa maong lungsod negatibo kini.

Daghan ang miingon nga lisud dakpon si Lacson ilabi na kun ang kapulisan na maoy tahasan niini pagsikop sanglit dili ikalimod nga duna may mga opisyal ug ordinaryong pulis ang misimpatiya sa senador.

Si Lacson nahimong regional director sa Central Visayas niadtong dekada 90 dihang kini maoy nangulo sa nakontrobersyal nga Philippine Anti Organized Crime Task Force (PAOCTF) kansang kanhi mga sakop aktibo pa sa serbisyo.

Apan si Digal mipasalig nga ilaha gyud dakpon ang senador subay sa warrant of arrest nga giisyu sa korte batok kaniya.

Sa iyang bahin si Sr. Supt. Melvin Ramon Buenafe, hepe sa Cebu City Police Office (CCPO) susama usab og baruganan kang Digal.

Siya miingon nga kun ugaling masigpatan si Lacson dinhi sa dakbayan andam silang modakop niini sanglit nag-atubang man og kaso ang senador apan wala pa sila makakuha og kopya sa warrant of arrest niini. – BANAT NEWS