Gob. Gwen gustong magsenador?

CEBU, Philippines - Si Senador Bong Revilla nangandoy nga si Gobernador Gwen Garcia mokandidato sa pagkasenador sa election sa tuig 2013 ug sa pagkabise presidente sa election sa 2016.

Kini pinaagi sa pagtawag niya kang Garcia nga umaabot nga senador ug ingon man umaabot nga bise presidente sa nasud atol sa iyang pagtambong sa birthday party sa gobernadora niadtong Martes sa tungang gabii. Apan si Garcia mipakagamay sa maong pagtuboy ni senador Revilla tungod kay wala pa moabot sa iyang hunahuna ang pagdagan og nasudnong posisyon.

Matud pa ni Garcia nga iyang gipasalamatan ang senador sa pagdayeg apan sa pagkakaron ang iyang gitutokan mao ang pagdoble sa iyang serbisyo sa probinsiya niining iyang katapusang tulo ka tuig nga termino.

Gipahibawo hinuon ni Garcia nga magpatabang siya ni Senador Revilla ug ni senador Jinggoy Estrada sa mga proyekto sa lalawigan partikular na sa pagpatukod og 600 ka mga classroom sa kalungsoran.

Sa maong paagi ang probinsiya maoy mopatuman sa maong proyekto aron makadaginot ang kagamhanan.  – BANAT NEWS