2 Patay sa managlahing aksidente sa motor

CEBU, Philippines - Duha ang namatay sa duha ka aksidente sa motorsiklo sa milabay’ng adlaw samtang laing duha ang naangol.

Sa aksidente sa motorsiklo nga nahitabo diha sa barangay Pundol sa lungsod sa Balamban niadtong Sabado sa gabii giila ni PO3 Celso Diaz sa Balamban police station ang mga biktima mao sila si Diosdado Albarca, residente sa maong lugar samtang ang nangaangol mao ang drayber sa motorsiklong si Warlito Marangga Hilamos, 20, ug ang backrider niining si Armand Racal, 21, residente sa nahitaboan.

Matud pang Diaz base sa imbestigasyon si Hilamos nagmaneho sa usa ka motorsiklo sakay si Racal gikan sa barangay Sta. Cruz ug padulong sa barangay Buanoy dihang nahitabo ang aksidente.

Gikatahong pag-abot sa maong dapit kalit nga milabang si Albarca ug wala na makahunong si Hilamos hinungdan sa pagkapunggit niini ug ang resulta misaliring usab ang motorsiklo.

Sila si Hilamos ug Racal daling gidala sa mga estambay ngadto sa Balamban District Hospital samtang gihatud sa mga mirespondeng mga polis si Albarca sa mao gihapong tambalanan apan gideklarar ang naulahi nga dead on arrival.

Samtang sa lungsod sa Borbon, usa ka lalaking nagmotorsiklo ang nakalas human kalit nga nabugto ang kadena sa iyang gimanehong motorsiklo ug misaliring.

Ang nakalas mao si Bonnie Enzo, 19, taga barangay Daan-Tabogon lungsod sa Tabogon kinsa nakaangkon og grabeng kadaut sa ulo ug kalawasan nga nakaingon sa iyang hinanaling kamatayon.

Sumala pa ni SPO2 Morie Magdadaro sa pakighinabi sa Banat News nga padulong na mopauli ang biktima dihang pag-abot sa sitio Pundol sa barangay Poblacion sa maong lungsod kalit nga naputol ang kadena sa motor ug natumba.

Gumikan sa kakusog sa dagan nabagnos kini uban sa iyang motorsiklo ug misampak sa punoan sa Iba. Ang biktima gisuwayan pagdala sa Damolog District Hospital sa lungsod sa Sogod apan nakabsan kini sa kinabuhi. (BANATNEWS)