Yllanan mag-muro, gibadlong

CEBU, Philippines - Si Konsehal Val Yllanan sa dakbayan sa Talisay gitambagan ni Konsehal Rodolfo Cabigas sa iyang privilege speech nga mag-usab sa iyang batasan ug dili magmuro.

“Lastly Mr. Chairman, I would like to suggest to my colleague Councilor Val to change his attitude. Dili lang unta ta magmuro-muro Mr. Chairman,” tipik sa privilege speech ni Cabigas.

Kagahapon sa gipahigayong sesyon sa konseho sa Talisay si Cabigas mitubag sa privilege speech ni Yllanan nga giyagyag niini sa milabay’ng semana.

Si Cabigas sa iyang privilege speech mihimakak sa mga pasangil ni Yllanan nga wala kini hatagi og patas nga pagtagad.

Si Yllanan wala hatagi og committee chairmanship ug duha lang usab ang iyang quota diha sa iyang opisina nga unta kaalyado man siya sa administrasyon.

Matud ni Cabigas nga si Yllanan wala hikawi sa konseho nga makasulti sa iyang mga opinyon ug gihatagan usab siya og katungod nga makareklamo.

Ug matud usab niya nga atol sa session sa pagpresentar sa committee chairmanship ug membership si Yllanan wala kini mireklamo.

“Nagpagoryo-goryo lang siya, Mr. Chairman,”   tipik sa privilege speech ni Cabigas.

Ang pagbaton og duha lang ka mga job order   dili babag sa pagpatuman ni Yllanan sa iyang pagserbisyo tungod kay niadtong tuig 1992-1995 hangtud sa tuig 1998 gibutyag ni Cabigas nga ubos siya sa oposisyon ug wala siya’y quota, wala usab gani siya’y mga gamit diha sa iyang buhatan apan wala siya moreklamo.

Ug bisan pa niini nakahatag gihapon siya og saktong serbisyo ngadto sa mga Talisaynon.

Si Cabigas nagkanayon nga si Yllanan dunay nahimong kalapasan sa partido apan wala iklaro ni Cabigas kung unsay nahimong kalapasan ni Yllanan.

Sa gipahigayon usab nga press conference kagahapon diha sa buhatan ni Bise Mayor Alan Bucao ang kabahin sa pagtapon ni Yllanan ang gituki.

Matud ni Bucao nga usa sa nahimong kalapasan ni Yllanan mao ang pagsuporta sa konsehal ngadto sa iyang kaatbang nga si kanhi Bise Mayor Aberdovey Belleza.  - BANAT NEWS