Mga polis gihagit pinusilay sa kagawad

CEBU, Philippines - Usa ka kagawad sa barangay Lagtang, dakbayan sa Talisay nga giingong hubog gipasanginlang nanghagad og pinusilay ngadto sa mga polis sa traffic division human siya giingnang adto mopa-blotter sa lungsod sa Minglanilla sa insidente kay ang maong hitabo didto man mahitabo sa Minglanilla niadtong Lunes sa gabii.

Si Kagawad Wilson Alferez gireklamo nilang PO2 Amelito Hornales, PO1 Oliver Ortega ug PO1 Aquilles Cabando sa traffic division sa Talisay City Police Office sa Tabunok.

Si SPO4 Henry Obiso, hepe sa traffic division nga nahinabi sa Banat News kagahapon nagkanayon nga si Alferez giingong hubog nga mianha sa ilang buhatan sa Tabunok aron magpa-blotter tungod kay giingong gitionan og pusil sa usa ka drayber nga iyang nakabangi kabahin sa trapiko.

Apan matud ni Obiso nga ang maong insidente nahitabo sa lungsod sa Minglanilla hinungdan nga giingnan siya ni Cabando nga adto magpa-blotter sa Minglanilla Police Station.

Si Alferez giingong nasuko ug mibuhi og dili maayong mga pulong ngadto sa mga polis ug gilamba ang pultahan sa buhatan sa traffic division atol sa iyang pagbiya.

Pag-abot ni Alferez sa parking area sa Tabunok giingong misinggit kini ug nagkanayon nga “mga buang mong mga polisa mo!, unsay inyong gusto gubat, pinusilay? Patay?”

Sa maong hitabo, si PO1 Cabando ug Ortega miadto sa Talisay City Police Station sa barangay Poblacion ug nagpa-blotter.

Si Kapitan Ronnie Cabuenas sa barangay Lagtang nga nahinabi sa Banat News kagahapon nagkanayon nga ipaubos niya sa imbestigasyon si Alferez mahitungod sa hitabo una siya mobuhat og aksiyon batok niini. Matud niini nga wala diha sa ilang balay si Alferez tungod kay mibiyahe kini ngadto sa dakbayan sa Carcar ug wala padalha og cellphone sa iyang asawa.

Sa pagsulat ning balita, si Cabuenas ug Alferez wala pa magka-estoryahay. (BANAT)