Traffic police gi-inspection sa CCPO

CEBU, Philippines - Gipahigayon kagahapon ang Pre-Annual General Inspection (PAGI) sa mga traffic police sa buhatan sa City Traffic Operation Management (CITOM).

Ang kapin sa 40 ka polis ug upat ka opisyal nila mi-atubang sa mga kadagkuan sa Cebu city Police Office (CCPO) sa pagsuta sa mga kakulangan sa ilang buhatan ug sa ilang pagka-traffic police.

Sa pakighinabi sa Banat News ni Police Chief Inspector Andres Bayarcal ang kanhi hepe sa Traffic Patrol Group, kinsa hepe na karon sa Waterfront Police Station, siya miingon nga ang PAGI maoy usa ka kalihukan aron pag-andam sa kapolisan sa ipahigayon nga Annual General Inspection (AGI)

Matud pa ni Bayarcal nga ang AGI ipahigayon sa sunod semana diin ang moduaw sa syudad sa Sugbo mao ang kadagkuan sa kapolisan sa Camp Crame. Midugang si Bayarcal nga sagad sa suta-on sa mga kadagkuan sa kapolisan sa CCPO mao ang supply sa mga kagamitan sa kapolisan kun ang usa ka polis anaa madestino sa opisina.

Kun ang usa ka polis anaa sa field suta-on usab kun andam ba kini kun adunay mga angayan nga respondihan. (BANAT NEWS)